Ka Meghalayan Age Pavilion ka rynsan pynisap ki trai jylla ba pyniasoh ka jingbei tyngka bad ki kam shangkai

U Myntri Rangbah ka Jylla u Conrad K Sangma ha ka sngi ula plie ia ka Meghalayan Age Pavilion ha Ward’s Lake ha ryngkat ka jingdonlang u Myntri ka kam jngohkai u Timothy D Shira, ki ophisar ka Urban Affairs, Kam Jngohkai, MTDC, ki nongsengkam, ki nongpynwandur ia ki jaiñ bad ki SHG.

Ka Meghalayan Age Pavilion ka dei ka jaka kaba kyrpang kaba ai ia ka rynsan na ka bynta ban pyni sap ki trai jylla bad ki jingpynmih jong ka jylla kiba pyniasoh bad ka jingbei tyngka, ki iew ki hat, kam jngohkai kaba ailad ia ki nongjngohkai bad ia ki nongshong shnong ban ioh mad ia ka jingshemphang ia ka jylla hapoh jong kawei ka tnum.

Ka MAL Store ha Pavilion ka wanrah lang ia ka bam, ki jain ki nep, ki jingpynmih lyngba ki jingthaiñ bad ki mar rep sha kawei ka iew kaba pura ha ka nongbah, kaba ailad ruh ia ki nongjngohkai bad ia ki nongshong shnong ban shemphang shaphang ka jylla hapoh jong kawei ka tnum.

Haba kren ha ka jingialang u Myntri Rangbah u Conrad K. Sangma ula ong, ba kane ka Pavilion kam dei satia tang ka iing paki dulan hynrei kadei kaei kaei kaba lan ban sngewthuh bad ban mad shaphang ka Meghalaya.

“Ka dei ka khana bad ka jingrakhe jong ki samla jong ngi, ka jingrakhe jong ki nongsengkam lajong, ka jingrakhe jong ki nongrep bad ka jingrakhe jong ka Meghalaya. Man la kawei pa kawei ka dukan bad man la kawei pa kawei ka jingpynmih kaba phin iohi hangne, kidei kiba don ia la ka khana. Ki ring mynsiem ia ka Meghalaya” ula ong.

Ula ong, baroh ki dukan ha ka Pavilion kidei ki nongseng kam lyngba ka PRIME kaba la kyrshan da ka Sorkar Meghalaya. Ka Sorkar Jylla kala ai ia ka jaka ha ka dor kaba jem na ka bynta ka 6 bnai haduh 1 snem ban kyrshan ia ki nongseng kam lajong.

Ka Meghalayan Store kadei kaba wanrah ia ki jingpynmih kiba na kylleng ka jylla, kiba la shna da ki Self Help Group, nongrep bad ki samla na ki shnong kiba don sha jngai bha, ban poi sha ka jaka kaba kongsan jongka Shillong.

Nalor kane, yn tei ruh ia ka Pavilion bad Experience Stores ha Barik Point, Polo Riverfront, Umiam hajan ka jaka shong lieng, ka jaka ha New Shillong Secretariat ryngkat bad ka jingdonlang jongka Unity Mall (kaba heh 20 shah ia kane ka Pavilion kaba mynta) bad ha Tura, Nongpoh, Jowai, Nongstoin, Williamnagar bad Baghmara.

Ha kane ka Pavilion kan don ruh ka dukan Wine Store, dukan die coffee, dukan die jingbam, ki dukan die jaiñ bad ki dukan die ia ki mar thaiñ kti bad kiwei kiwei.