Shah khang khyrdep bun ki dukan bar jylla ha ka jingjurip kyndit ka JNC ha Khliehriat

Ka Central Executive Committee (CEC) jong ka Jaiñtia National Council (JNC) mynta ka sngi kala pynlong jingjurip kynsan iaki laisen khaii (trading licence) bad service licence haka shnong Khliehriat West, kaba dei ka headquarter jong ka East Jaiñtia Hills district, bad ia kane ka jingjurip ka seng ka ong ba kala leh katkum ka kyndon jong ka JHADC Trading by Non-Tribal Rules, 2015, ha kaba la don lang ki nongtrei ka JHADC.

U General Secretary ka JNC CEC u bah Wanshwa Suting u ïathuh ba kane ka jingleit jurip jongki dei hadien ba ki lah iohi iaka jingbun palat ki briew bar Jylla ba pynïaid ïa ki dukan bad ki kam khaii ha East Jaiñtia Hills.

Bad ka jingthmu ba kongsan ka long ban pynshisha la kine ki nongpyniaid ne jaka treikam ki don ne em ia ki laisen bad ki kot ki sla kiba biang, namar ka jingbym don ki laisen bad ki kot ki sla dei kawei na ki daw bah ba pynlong iaka jingduh khajna ka JHADC.

Katkum ka jingong u General Secretary haka jingjurip kila lap bun ki dukan bad ki jaka treikam kim don iaki laisen bad ki kot ki sla ba donkam, nalor ba don ruh kiba treikam beain khlem kano kano ka laisen ne ki kot ki sla kiba donkam.

Ka rukom ba kum kine kam ktah tang iaka khajna jong ka JHADC hynrei ka wanrah jingeh ruh iaki briew trai ri, khamtam naka jingshah knieh ki kam ki jam, ki kam khaii ba lah ban trei daki trai muluk.

Hadien ka jingjurip, ka seng kala khang khyrdep ïa kiba bun tylli ki dukan bad ki kam kiba treikam khlem ki laisen bad ki kot ki sla ba donkam bad kala buh jingmaham ba tyngeh ïaki nongpynïaid bym dei ki riewlum ha ryngkat ki briew ka JHADC.

U bah Wanshwa u la pynpaw shuh shuh ba ïa ki jaka treikam kiba don ïa ki laisen khaii kiba biang hynrei ki bym don ïa ki kot ki sla ba donkam la ai por shi taiew ban pynbiang ïa ki bad lada kim lah ban pynbiang hapoh ka por ba la buh, ka seng kan sa pynshitom da kaba tyngeh.