Buh Mawnongrim u Myntri Rangbah ia ka Mini Secretariat ba T.17.76 klur ha Patharkhmah

U Myntri Rangbah ka Jylla u Conrad K Sangma hynne ka sngi ula buh mawnongrim ban tei ia ka Mini Secretariat ha Patharkhmah ha ka jinglut ba T.17.76 klur.

Ia une u mawnongrim la buh ha ka jingialang ba la pynlong ha madan football jong ka Western Ri-Bhoi, Patharkhmah ha ka jingiadonlang u Myntri ka Sorkar jylla u Bah Sosthenes Sohtun uba dei ruh u MLA ka Jirang Constituency, u bah C.V Diengdoh Commisioner & Secretary GAD, u Dr. Abhishek Saini Deputy Commisioner ka Ri Bhoi, u Giri Prasad, SP ka Ri Bhoi lem bad kiwei ki heh ophisar ka Sorkar.

Ha kane ka sngi, U Myntri Rangbah ka jylla u la plie ruh ïa ka building skul thymmai jong ka Patharkhmah Hr. Sec. School bad ïa ka Patharkhmah Model Degree Collage.

Nalor kitei ki kam pynroi, u Myntri Rangbah ka jylla u la plie paidbah ruh ia ka Building Thymmai jong ka Jirang C&RD Block ïa kaba la aiti ban khap rib bon ïa ka Samla Ribansi Jamu ka thei ialehkai phutbol na Jirang kaba la mih khmat ïa ka ri Indian ha ka lympung ïalehkai kynjatbol.

Haba kren ha katei la jingïalang, u Myntri Rangbah ka jylla u Conrad Sangma ula ong, ba ka jingbuh mawnongrim na bynta ka Mini Secretariat ha Patharkhmah ka dei ka jingkut jingmut ka Sorkar ban wanrah ïa ki jaka treikam sorkar marjan bad ki paidbah khnang ba kan kloi ban iarap ia ki paidbah.

U la iathuh ruh, ka Mini Secretariat kaba la buh mawnongrim mynta ka sngi kan wanrah lang ia ki ophis treikam jong ka Sorkar bapher bapher khnang ba ki nong shongshnong kin lah ban pyndep ia ki kam jong ki ha kapor kaba biang bad kin nym donkam bam leit na kawei ka jaka sha kawei pat.

U la pynpaw ruh, ka Sorkar ka don ia ka jingangnud bad ki paidbah kim dei ban iaid da ki kynta kynta lane da ki sngi ban ioh ia ka jingshakri na ki tnad Sorkar hynrei ka dei ka kamram jong ka Sorkar ban wanrah ïa ka bor synshar shajan jong u paidbah.

U la iathuh ruh bun na kine ki project jong ka Sorkar ki dei kiba ha Western Ri-Bhoi ba kynthup ia ka jingkieng steel kaba T.16.58, ka surok kaba mih sha Patharkhmah Model Degree College ba T.3.51 klur bad ka Jirang Primary Health Centre ka ba T.1.26 klur.

U Myntri Rangbah u la ong ruh, Ka Patharkhmah Model Degree College ka dei ka college ba nyngkong eh jong ka Sorkar ha Ri-Bhoi, kaba lah ban ai jingmyntoi shibun iaki khun samla kiba wat iaka jingnang jingstad.

U la pynpaw ruh, Haduh mynta, bun ki samla pule ka Western Ri-Bhoi kiba pyndep ia ka klas XII ki hap ban leit sha Nongpoh lane Shillong lane sha kiwei kiwei ki jylla ban ioh pule iaki kyrdan kiba kham shalor bad bun ki longiing kim lah ban kyrshan ia ka jinglut jingsep bad lyngba ka jingdon jong kane ka College kan ai lad ia kum kita ki longiing ban phah pule iaki khun ki kti jong ki.

U Myntri Rangbah u la iathuh, Ka Sorkar kala pynmang pisa ban shna pynbha ia ki Block Office ha kylleng ka District jong ka Ri-Bhoi bad kawei na kitei ka dei ka Mawhati C&RD Block la dep ban pynmang tyngka ba T.4.50 klur ban tei iaka building kaba thymmai.

Khatduh, u la kyntu ïaki ophisar Sorkar ba kin ai ka jingshakri da ka mynsiem kaba sngewrit bad ka dur kaba phuh samrkhie sha ki paidbah khnang ba ki paidbah kin ioh iaka jingshaniah. U la kyntu ruh ia ki kynhun bapher bapher ki ba ai ka shakri ia ka imlang sahlang ba kin ïa don bynta lang ha ki kam ban kyntiew iaka shnong bad ka district namar dei lyngba ka jingiatreilang bad snohktilang ba yn lah ban kyntiew iaka jylla Meghalaya.