U Symbud Myntri Rangbah ka jylla u bah Sniawbhalang Dhar hynne ka sngi ula pyntip ba ka sorkar ka la rai ban shna ia ka Parking Lot ha ki thain Umtyngar ka ban don ia ki jingdonkam baroh kan long ruh kum kawei ka jaka jngohkai pyrthei kaba ki tourist kin kiew kin hiar ha kane ka jaka haba ki wan ha kane ka jylla.
Ia kane u Symbud Myntri Rangbah ula pyntip hadien ba la wai ka jingialang bad ki nongniah tourist, ki nongpyniaid hotel, ki tour guide bad ki wei kiwei de.
Haba kren sha ki lad pathai khubor u Symbud Myntri Rangbah ka jylla u bah Sniawbhalang Dhar u la ong ba kane ka jingialang ka long kaba don kam haduh katta katta bad ka long ruh kaba seisoh.
“ Nga khot lang ia ki nongpyniaid Hotel, ki tour Guide, ki Homestay, ka long ba ngan kyrpad ba lada long ba kin pyndonkam ia ki kali jylla haba wan ki nongjngohkai,” ong u bah Sniawbhalang.
U Symbud Myntri Rangbah ula iathuh ba ia mynta kin sdang shna shwa ka Parking ha kane ka jaka bad kin sa leh sa ha kiwei ki jaka ka jylla.
Ula iathuh ruh ba ki la thaw ia ka Committee ha kaba baroh ki kynhun ki la ia don ryngkat lang ba kin lah ban ia pyrkhat kumno ban iaid shakhmat haba ia dei bad ka jingpyndon kam ia ki kali trai jylla.
Haba ia dei bad ka jingwan ki kali na ki jylla bapher bapher u la ong ba kane ka jingiakynduh ka dei ban thaw ia ki lad ki lynti ban pynbha bad kan ym don kano kano ka jingktah iano iano ruh. U la ong ba ka jingwan ruh ki briew sha ka jylla ka la kiew biang bad ki don ka jingkyrmen ba ha kine ki snem ki ban wan ki briew kaba wan jngohkai sha ka jylla kan kiew shuh shuh.
U la ong ruh ba ka tnat pulit ka dei ban peit pyrman bha haba ia dei bad ka suk ka sain ia ki nongwanjngoh kai pyrthei, khnang ba ka leit ka wan jong ki nongleit nongwan bad ruh ki paidbah kan ym don ka jingthud.
U la iathuh ruh ba ka sorkar ka la iakren haba iadei bad ka jingbuh ia ki CCTV Camera ha ki Home stay bad ruh ha ki jaka kiba dei na ka bynta ka jingshngain jong ki paidbah nongleit nongwan.