Dawa ka HYC ban bhah kyrpang ia ki samla trai ri ban pule Nursing ha NEIGRIHMS

Ka Hynñiewtrep Youths’ Council (HYC) hynne ka sngi ka la dawa ban don noh ka bhah kyrpang na ka bynta ki samla trai ri ka Meghalaya ban ioh pule ha North Eastern Indira Gandhi Regional Institute of Health and Medical Sciences (NEIGRIHMS).

Kane ka jingdawa ka HYC ka la mih, hadien ba ym shim la don wat tang uwei u samla pule ka Meghalaya uba la paw kyrteng ha ka Provisional List ne thup kyrteng jong ki 48 ngut ki samla pule B.Sc. Nursing ha NEIGRIHMS na bynta ka samoi 2026-27.

Katkum ka kyrwoh khubor ka HYC ka la pyntip ba ka la phah ia ka dorkhas sha u Director ka NEIGRIHMS, bad pynpaw ba katei ka thup kyrteng kaba la pynmih ha ka 7 tarik u Nailur 2026 kala iehnoh ia ki samla kiba don jingthrang ban yn ym ioh ‘Seat’ ha katei ka jaka pule jong ka Sorkar Pdeng kaba don ha Shillong.

Ka HYC kala pynpaw ruh ba ka burom ia ka jingwan shakhmat jong ki samla pule bad ia ka kyrdan ka NEIGRIHMS hapoh ka ri, hynrei kala pynpaw pat ba ki samla pule ka Meghalaya kidei ban ioh ia ka kabu kaba don jingmut kaba ka bym noh shilliang ha la ka jong ka Jylla. Kala kyntu ia ka NEIGRIHMS ban pdiang ha kaban bhah kyrpang kaba long kum ha RIMS, Imphal bad ka jingbhah kaba la don lypa na ka bynta ki samla pule MBBS ka Meghalaya ha NEIGRIHMS.

Ka la dawa ba dei ban shimkhia ia kane ka mat ha ka jingialang jongka Governing Council Meeting kaban long ha ka 27 tarik u Risaw, ban wanrah ia ka jingbhah kyrpang na ka bynta ka Jylla bad ban wanrah ia ki jingpynkylla kiba kongsan ha kaba iadei bad ki kyndon ban pdiang ia ki samla pule. Kane ka sienjam, kan iarap ha kaban pynbha ia ka lad ban ioh ia ka jingpule ha ki kyrdan kiba heh na ka bynta ki samla trai ri trai muluk bad kan iarap ha kaban tei ia ka sap ka phong jongki nongtrei ha ka liang ka koit ka khiah ha Meghalaya.

Ka HYC kala ong, ba ka kyrmen skhem ba ki bor kiba dei khmih kin pynthikna ba ki samla trai ri trai muluk kiba dei hok kin ym shah iehnoh shadien.