Plie u Conrad ia ka Block Complex Gambegre ba T.3 klur

U Myntri Rangbah ka Jylla u Conrad K Sangma hynne ka sngi, ula plie paidbah ia ka Block Integrated Development Complex ka Gambegre, West Garo Hills, ha kaba ka MLA ka thaiñ ka Mehtab Chandee A Sangma bad ka Aking Nokma ka Gambegre ka Chekme Ch Marak kiba la iashimbynta lang ha kaban khap ia u ribon jong kane ka ophis jong ka Block kaba thymmai.

U Myntri Rangbah ula pynkup burom ruh ia ka Aking Nokma kaba la noh synniang ia ka jaka ban tei ia kane ka ophis treikam bad ha kane ka sngi, ula plie paitbah ruh ia ka digital library bad ia ka SBI ATM.

Haba kren ha ka jingialang, u Myntri Rangbah ula ong, ha ka histori jong ka Meghalaya, baroh 56 tylli ki C&RD Blocks kidei kiba la dep ban tei sha ki jingtei kiba thymmai.

Ula ong, ba kiba bun hi ki skhim sorkar kidei kiba la sam lyngba ki Block Office bad ka long kaba kongsan bha ba ki Block Office kin don ia ki jingtei kiba donkam bad da kaba iaid da ki wat, ka sorkar kala plie ia kine ki ophis treikam kiba thymmai.

“Ha ka jingleit jngoh ka jong nga ha kylleng jong ka Jylla, Nga la sakhi ia ki jingtei kiba la rim bad kiba don jingduna ha ki Block Office, kaba lam sha ka jingmut jingpyrkhat ban don noh ia ki Block Office kiba thymmai” la ong u Conrad bad ka batai balei lah ai kyrteng Integrated Block Development Office, kadei da ka jingthmu ka long ban ai ia baroh ki jait jingai jingshakri ia ki paitbah, kynthup ka jingai ia ki Caste Certificate bad EPIC na ka Block Office.

“Ngi kwah ban wanrah ia ka jingshakri paitbah sha ki Block da ka jingpyndonkam ia ki kor teknoloji” ula ong.

“Ngi lah dep plie ia ka CM Connect Centre ha kylleng ki Block bad ka Gambegre shen kan sa ioh ia ka CM Connect Centre. Ka CM Connect Centre kan plie lad ha kaban pynsuk ia ki kam ai jingshakri ia ki paitbah halor ki skhim ki bapher bapher, kynthup ia ka jingrejistar ia ki jingujor” ula ong.

Ula kyntu ia ki ophisar ba kin trei da kaba aiti ialade bad ban trei thikna ha kaban shakri ia ki paitbah.

Ka Gambegre Complex ka dei shibynta jong ka prokram bala sdang pyntreikam ha u snem 2022-23 ban kyntiew kyrdan ia baroh 56 tylli ki C&RD Block ha Meghalaya.

“Ha ki 2 snem kiba la dep, ngi lah trei na ka bynta ka Gambegre bad sdang ia kliba bun tylli ki kam pynroi. Ka MLA ka Mehtab Chandee kala wanrah ia kiba bun ki jingsngewkhia na ka bynta ka thaiñ Gambegre bad ngi la lah ban sdang ia ki kam pynroi. Ngi dang don bun ki kam ban leh, kiba ngi kular ban ai ka jingshakri” la ong u Conrad.

Katba ka Dr Mehtab Chandee A Sangma kala ong, ba ka sorkar ka shakri ia ki paitbah lyngba ki ophis jong ka Block bad kadei ka lynti kaba ka sorkar ka pyntreikam ia ki skhim.

“U Myntri Rangbah ula long uba la kylluid mynsiem ban shimkhia ia kane ka projek kaba kongsan ban kyntiew ia baroh ki block office ha kylleng ka Jylla Meghalaya. Ka sorkar kala iengskhem ha ka nongrim ban shakri ia ki paitbah bad ban tuklar ba dei ban kyntiew ia ki jingtei ha ki thaiñ nongkyndong bad kadei kaba kala buh hakhmat eh” kala ong.

Ia ka Block Integrated Development Complex jong ka Gambegre C&RD Block la tei ha ka jinglut kaba kot T.3 Klur. Ka dei kawei na ki 40 tylli ki Integrated Complex kiba la mang ha u snem 2022-23. Na ki 40 tylli ki Complex, lah dep shna haduh 34 tylli, kiba dang sah sa hynriew tylli kidei kiba la jan dep artad, kumta ka jingtei baroh kala kot ia ka 99.53 percent.

Ki block office kidei ki ophis ba nyngkong eh ban iakynduh hapdeng ki longiing ha nongkyndong bad ka Sorkar. Ki skhim na ka bynta ki surok ha nongkyndong, jingshna iing, kamai kajih bad ka lad iohkam iohkam kila poi sha ki shnong ki thaw lyngba ki bor pyniaid jong ka Block.