Ka jingplie ïa ka Khet Bachao Abhiyan (Rabi) Campaign ha “KVK West Khasi Hills”,

Ïa ka Khet Bachao Abhiyan (Rabi) Campaign (22 Risaw – 30 Naiwieng, 2026) la plie ha ka office jong ka Krishi Vigyan Kendra (KVK),West Khasi Hills, Nongshillong ha ka 22 tarik u Risaw, 2026 hapoh ka phang pdeng “Ka Khyndew kaba Koit ba Khiah, Ki Nongrep kiba Kiew Shaphrang.” (Healthy Soil, Prosperous Farmers). Ïa kane ka prokram la pynlong da ka KVK West Khasi Hills ha ryngkat ka jingïatreilang bad ka ophis ka District Agriculture Officer, Eastern West Khasi Hills, ban ai jingpynshai bad ban kyntiew ïa ka rukom rep ha ka aiom tlang kaba pynïoh jingmyntoi bad ka bymktah ïa ka mariang.

Ïa kane ka campaign rep kaba long ha baroh kawei ka ri, la plie ryntih ruh da u Myntri ka sorkar pdeng ba dei peit ïa ka rep ka riang bad ka bha ka miat ki nongrep, u Shivraj Singh Chouhan, na Karnal, Haryana, ha ka 22 tarik u October, 2026.

Kane ka prokram ka pynïakynduh lang ïa ki nongrep bad kiwei ki kynhun ba ïadei bad ka rep ka riang ban pynshai ïa ka jingkongsan ban sumar ïa ka jingbha ka khyndew, kyntiew ïa ka jingmih ki jingthung bad pyndonkam ïa ki rukom rep saian (scientific) na ka bynta ban kyntiew ïa ka rep ka riang kaba ïaineh bad ka bym don jingktah.

Ha ka por ba plie ïa kane ka prokram, la pynshai halor ka jingkongsan ban pynneh ïa ka jingsboh ka khyndew bad ban sumar ïa ka mariang. La kyntu ïa ki nongrep ban ai sboh katkum ka jingdonkam lyngba ki report na ka jingtest ïa ka khyndew, ban pyndonkam da ki sboh mariang, ban thung kylliang ïa ki jingthung (crop rotation) bad ban pynduna ïa ka jingpyndonkam pathar ïa ki sboh dawai (chemical). La ban jur ruh ban sumar ïa ka khyndew sboh (soil organic matter), ka jingshah rong ka khyndew ha ka um slap (soil erosion) bad kumno ban pynneh ïa ka jingbha ka khyndew haduh ki pateng ki ban wan.

Da kaba pynshlur ïa ki nongrep ban bud ïa ki rukom rep da ki buit saian kiba katkum kane ka juk. Kane ka sienjam ka thmu ban wanrah ïa ka rep ka riang kaba ïaineh bad ka bym don jingktah, kaba lah ban ïakhun ïa ka jingkylla ka suinbneng bad ban pynkiew ïa ka ïoh ka kot khamtam ha ki thain nongkyndong.

Ki saiantis jong ka KVK kin ïatreilang met bad mynsiem ha kane ka campaign da kaba ai jinghikai, pynlong ki prokram pynshai nongrep bad wanrah ïa ki rukom rep kiba thymmai kiba ïahap bad ka suinbneng. Ki nongrep ki lah ban ïoh jingmyntoi na ki jinghikai saian shaphang ka jingpynkhreh ïa ka khyndew, ka jingjied ïa ki symbai tlang (Rabi) kiba biang, ban bet symbai ha ka por ba biang, ka jingpynlumlang ïa ki sboh kiba bunjait (integrated nutrient management), ka jingkynshew um bad ka jingïada na ki khñiang bad jingpang ha u jingthung (integrated pest and disease management).

Kane ka campaign ka ai lad ruh ban pynkhlaiñ ïa ka jingïatreilang hapdeng ka ophis KVK West Khasi Hills bad ka Ophis District Agriculture, Eastern West Khasi Hills, ban pynpoi sha ki nongrep ïa ki buit ki bor bad ki jingbthah shaphang ka rep ka riang. Lyngba ki jinghikai, ki prokram pyntbit bad ka jingïakynduh bad ki nongrep, kane ka campaign ka thmu ban kyntu ïa ki rukom rep kiba myntoi, bym lut phut bad kiba pynbha ïa ka mariang.

Ka jingiasnohkti lang ki nongrep, ki FPO (Farmer Producer Organizations), ki Co-operative Society, ki SHG bad ki nongrep kiba lah paw (progressive farmers) ryngkat bad ka jingkyrshan na ka District Agriculture Office, KVK, ATMA, bad ICAR kan pynurlong ïa ki thong jong ka Khet Bachao Abhiyan ha ka aiom tlang (Rabi) ha Eastern West Khasi Hills District.