Shah kawang Petrol Bom ar jaka ha Mawbah, ingkhong ka Scooty

Ar tylli ki jingjia ba ia dei bad ki jingsuba kawang petrol bomb ki la jia ha Mawbah ha ka miet Sngi Saitjain ka 17 tarik Risaw, ha kaba uwei u petrol bomb la kawang hakhmat ka dukan bam ‘fast food’ hynrei ym shym la bthei bad kawei ka scooty kaba ieng harud surok pat ka la ingkhong khait na ka jingshah kawang Petrol Bomb.
U Rangbah Shnong ka Mawbah, u bah Aresstone Thabah ula iathuh ba ula ioh jingtip na ki nongshong shnong ha ka por kumba 9:45 baje miet ba don kiba kawang petrol bom sha kawei ka dukan bam hynrei uta u bom um shym la bthei bad hadien kumba 10 haduh 15 minit eiei, u la ioh sa kawei pat ka phone kaba pyntip ia ka jingjia ba jia harum ka Iing Dorbar shnong, harud ka lynti iaid kaba pyniasoh ia ka Mawbah bad ka Lower Mawprem. Ha kaba kawei ka scooty jong u Rameshwar Prasad, uba dei u nongshong shnong ka thain, kaba ula pynieng harud surok ka la kem ding bad ka la ingkhong syndon.
U bah Thabah u la ong ba ha kane ka jingjia ym don ba iohi ia ka jingkawang petrol bom bad ki nongshong shnong ki iohi ia ka jingjia hadien ba ki la iohi ia ka jingkem ding iaka scooty.
Hadien kane ka jingjia, na ka liang ki pulit ka Jhalupara Police Outpost ki la poi mar mar mar sha katei ka jaka ban buddien ia ka jingjia.
Na ka liang u Superintendent of Police ka East Khasi Hills, u bah Vivek Syiem, u la ong ba ki pulit ki la ioh jingtip ha ka por kumba 9:45 baje miet, kawei ka scooty ka la iing bad thang da ki riewshim kabu ha Mawbah.
“Ngi dang tohkit ia kane ka jingjia,” ong u bah Vivek.