Pyllait ka KSU ar tylli ki kali nongpang

Ka KSU North Khasi Hills District Unit ha ryngkat ka KSU North Khasi Hills Eastern Border Area hynne ka sngi ka la pyllait paidbah ia 2 tylli ki Ambulance ha Mawbri.Ia kine ki ar tylli ki kali Ambulance, kawei ka dei ka kali Bolero kaba la ai sngewbha da u Bah Ngaitlang Dhar, katba kawei pat ka dei ka kali Eco jong ka KSU NKHD Unit.Ia ka Ambulance Bolero yn buh kyrpang na bynta ban ai jingshakri ha ki thaiñ Eastern Border Area katba ia ka kali Eco yn pyndonkam hapoh ka District Ri Bhoi, khnang ban pynsuk ïa ki paidbah, khamtam eh ïa kiba donkam kyrkieh ïa ka jingshakri ha ka pang ka shitom.

Ha shwa ban pyllait paidbah u Fr. Balestine Marbaniang ula pynlong ïa ka jingduwai bad ka jingkyrkhu, ryngkat bad ka jingsynreit ïa ka um kyrkhu, khnang ba kine ki kali kin lah ban ai jingshakri kaba bha ïa ki paidbah.Haba kren ha kane ka sngi u Bah Ngaitlang Dhar u la ong ba bun ki briew ki ju pyrkhat ba u long uba riewspah, hynrei ka jingdon kaba kham kordor ka dei ka mynsiem ban ïarap ïa ki briew kiba donkam jingïarap, khamtam eh kiba pang ba shitom.U la kyntu ïa ki nongïalam ka KSU NKHD Unit ba kin shim ïa ka jingkitkhlieh ban sumar bad pynneh pynsah ïa kane ka kali.

U la ong ruh ba ka jingai sngewbha kam dei tang ban pynlong ïa ka sngi rakhe ne pdiang, hynrei ka dei ka jingaiti ïa ka jingkitkhlieh ban pynneh ïa ka jingshakri na ka bynta ka bha ka miat jong ki paidbah. Ha kane ka sngi la donlang u MLA ka Umroi Constituency, u Bah Damanbait Lamare, U President ka KSU NKHD Unit, Samla Ferdynald Kharkamni, U General Secretary, Samla James Hitler Mawphiang, U Parish Priest ka Mawbri Parish, u Fr. Balestine Marbaniang; u Dr. Bareh, Joint Director barim ka DHS, u Bah P.B. Sylliang, Secretary ka Synjuk ki Rangbah Shnong ka Ri Bhoi District bad kiwei ki riew rangbah bad ki nongshah khot sngewbha.