Shongshit ka Talent Fiesta ka Sacred Heart Girls HSS, Mawlai

Ka Talent Fiesta balai sngi ba la pyniaid da ka Sacred Heart Girls Higher Secondary School, Mawlai ka la long kaba shongshit da ka jingiashim bynta shitrhem jong ki khynnah kiba pule ha kane ka skul kaba don kumba 1455 ngut ki khynnah bad 65 ngut ki nonghikai.
Ha kane ka Talent Fiesta ki kynthup ia ki jingiakob ia Debate, ka tang shi kyntien, Dancing, Flower Arrangement, Fancy Dress, Story Telling bad kiwei kiwei.
La pynshit shongshit ia ka sngi kut da ka jingshad na ka Wanbiang Nonglang, rwai na ka Abigail Rymmai bad shad ruh na ka samla Elizabeth Lyngdoh, kaba la ju ak ruh ha ki jingrwai ba pynmih ha ki youtube bad kiwei kiwei.
Ha kane ka jingiakob jong kane ka skul ka Blue House ka la iohrah ia ka trophy kum ka best Discipline bad ka Green House ia ka trophy Overall Champions.
Ha ka sngi kut la sakhia da u MLA barim bah PT Sawkmie, ha ka jingdon ryngkat sister Principal Evalynejoy Kympat, Superior sister Iris Suchiang, sister Bertina Kurbah, ki nonghikai bad kiwei kiwei.
Haba ai jingkren u bah Sawkmie u la pynpaw ia ka jingsngewkmen ia ka skul lyngba ka Principal kaba la khot sngewbha ia u, ha kaba u la iaroh bad pyrto ia kane ka prokram ba la pynlong ba ka la long kaba shongkhia bad ba i shongkun.
Ha kajuh ka por u la ai mynsiem bad pynshlur ia ki khynnah ba kin shim bynta barabor ha ki prokram ba ka skul ka pynlong.
Katba na ka liang ka principal ka la ai khublei bad pynpaw ia ka jingsngewnguh ia u Bah PT Sawkmie uba ju iai don ryngkat barobor bad ka skul bad kumjuh ia ka jingnohsynniang jong u ha kane ka sngi.
Kane ka Talent Fiesta ka la sdang ha ka 21 bad kut ha ka 23 tarik u Risaw, 2026.