Ka jingkhlain ka shong ha ka jingioh vote ha ka ilekshon : James Sangma

U MP ka Rajya Sabha u James K Sangma ula ong, ka jingkiew kynsan ka BJP na ki 2 ngut sha ka 10 ngut ki MLA hadien ka jingleit pyniasoh ia 8 ngut ki MLA ka UDP ka dei ka jingkylla ha ka kam saiñ pyrthei hynrei ka jingshisha ka jingkhlain ka seng ka shong na ka jingioh vote ha ka por elekshon.
U James Sangma uba long u Nongialam ka seng NPP haba iakren ha kine ki khyndiat sngi ula ong, ba ka jingphet seng ka jia khah khah ha ka kam saiñ pyrthei ha ri India.
“Kane baroh ka dei ka politik, ki briew ki leit rung na kawei ka seng sha kawei pat, kine ki jingjia ki dei kiba ju iai jia ha ka kam saiñ pyrthei hapoh ri India. Ngi la sakhi man ka por hynrei ka iapher pat na ka jingjied ki paitbah ha ka por elekshon” la ong u MP ka Rajya Sabha.
Ula ong, ka jingthew ba shisha ia ka jingkhlain ka seng kan shong eh ha ka jingioh vote ha ka por elekshon bad kumta ka long donkam ban thew na kaei ba mih ka resol elekshon bad haduh katno ki seng saiñ pyrthei ki ioh vote ha ka elekshon.
Halor ka jingkylli la ka jingkiew ka BJP ha ka jingdon ia ki MLA kan ktah ia ka NPP u James ula ong, “Ka jingkylla ha ka jingkhlain ka seng ha kaba ia dei bad ka jingmihkhmat hapoh ka ïingdorbar kan wanrah ia ka jingkylla ha ka jinglong jingman. Hynrei haduh katno kane kan wanrah ia ka jingkylla ha ki shnong ki thaw bad ka jingkhlain ka seng ha ka por elekshon, kine ki dei ki artylli ki bynta kiba iapher kawei na kawei pat. Hooid, ha kawei ka bynta kan wanrah ia ka jingktah hynrei ha kawei pat ka liang, ka lah pat ban ym don satia kano kano ka jingktah”.
Ha kaba ia dei bad ka jingsaphriang ki khubor ba u Bah Metbah Lyngdoh u President ka UDP namar ba ula sah marwei, kumta u lah ban shah pynhiar shuki noh na ka Kynhun Myntri, u James ula ong, ba um donbynta eiei bad ka sorkar, hynrei u dei tang u Member of Parliament (MP). Kumta ia kum kine ki jingkylli dei ban kylli ia ka Sorkar Jylla, ki Myntri Sorkar ne ia u Myntri Rangbah ka Jylla.