Kdiah u budlum ka shnong New Jirang, ki surok 28 snem ym pat maramot

Ki nongialam seng sain pyrthei ki ju ong, ka surok ka long u budlum ia ka roi ka par ki paidbah nongshong shnong ka jylla bad la sakhi shisha ia ka jingkiew ka ioh ka kot ki shnong ki thain kyndong kiba la ioh surok haba nujor bad kiwei pat shnong ba dang iaid kjat bym don surok wat hadien 50 snem tam ba la ioh ka jylla Meghalaya.
Hynrei kaba lyngngoh ki don pat ki shnong kiba ioh surok kum ka Wahsynon, Umlakro, Centre Village, Umsohpanan bad Iowsohksang ha New Jirang, Ri Bhoi District ki mad ia ka jingeh, namar ki surok ki la sniew lut bad kylla surok khyndew bym don ba pynbha bad ka long kumba kdiah ia u budlum ka roi ka par ka shnong New Jirang.
La iathuh ki surok ha shnong New Jirang la shna ha ka por ba
long ka jingiaseng KJP Synod ha u snem 1998, bad naduh ba shna ha ka por ba long jingiaseng Synod, ka tnad PWD kam shym la pynbha shuh mynta palat 28 snem, kane ka wanrah jingeh ia ki paidbah ha ka leit ka wan khamtam ha ki aiom slap.
Halor kane ka jingeh, ki rangbah shnong ka thain ki pynpaw ka jingsngewkhia ba ka tnad PWD ba dei peit ka la leh klet ban maramot ia ki surok ba ki paidbah ki leit ki wan man ka sngi. Kumta ki la kyntu ia u MLA/MDC ba long ruh u myntri sorkar ban tuklar lem na bynta ka jingbit jingbiang ki paidbah nongshong shnong ka thain.
Ka shnong New Jirang ka dei ka nongbah ka Hima Jirang ha kaba ki paidbah ki leit ki wan man ka sngi ban pyndep ki kam ki jam bad ka Hima Jirang bad kumjuh ban thied ki jingdonkam ha iing ha sem bad ka tnad PWD ka dei ban shimkhia ban maramot noh kloi ia kitei ki surok na bynta ka jingbit jingbiang ka thain Jirang.
Kum ban pynpaw ka sorkar ka buh thong ban pynpoi surok ha baroh ki shnong ban suk ki paidbah bad ka kit ka bah ha ka khaii pateng, hynrei palat 1600 ki shnong ha jylla ki dang don ba iaid kjat haduh mynta namar bym don surok.