Paw ka sap ki samla pule Politeknik Jowai ia ka jingibit ban shna ia ki kor ki bor

Ki samla pule ka Jowai Polytechnic lyngba ka Technophilia 2, A technical exhibition ba ka la pynlong mynta ka sngi kila pynpaw pyrthei bad pyni rong ia ka sap ka phong ba ki la ioh jinghikai na kane shlem pule ba kynthup ka jingshna ia ki kor ki bor kum ki kali ki bike saw shaka, lai shaka bad arshaka, nangta ki bycycle, ki kor kynrih shyiap bad kiwei, nalor ki buit shna pynwandur ia ki iing ki sem ki ophis treikam, ki jingdro dur ba bunjait.

Kane ka shem pule ka kynthup ia ki tnat pule Architectural Assistantship, ka Automobile Engineering bad ka Costume Design & Garment Technology.

Ha kane ka sngi u Vijay Kumar Mantri, IAS, Commissioner & Secretary, ka tnat pule puthi ka sorkar jylla ula long kum u kongsan ryngkat ka jingdonlang u F.B. Ramseij Joint Director (Technical) Directorate of Higher and Technical Education (DHTE), u F.Rumnong, Deputy Director (General) Directorate of Higher and Technical Education (DHTE), u Principal ka Kiang Nangbah Govt. College Jowai u H.Toi ki nonghikai ka Jowai polytechnic bad kiwei.

U kongsan Vijay Kumar Mantri ula pashat halor ka jingdonkam ban kylla na ka jingpule lyngba ki kot sha ka jingpule kaba ai ia ki jingshemphang bad ki sap treikam (practical skill-oriented learning).

U la pynshlur iaka shlem pule ban pynleit jingmut khamtam halor ki jingai jinghikai kiba pyndonkam da ki kti ne ka jingtrei hi da lade (hands-on training) lyngba ki laboratories, ki workshops bad ki project naduh ba sdang ka jingpule.

Haka juk mynta ba ka jingnang jingtip la nang suk ban ioh lyngba ki rynsan digital bad artificial intelligence (AI), u la ban ba ki sap treikam bad ka jingstad pyntrei kam (technical competence) ruh kila nang donkam shuh shuh ban pynbiang iaki jingdawa jong ki karkhana bad ki kam ki jam.

U la kyntu ruh ia ki shem pule ba ki dei ban pynkylla bad pynjanai iaki rukom hikai katkum ki jingkylla ha ka teknoloji.

U khot kyntu ruh ka jingtreilang ba khlain ki tnat kharkhana bad pynshlur iaka shlem ai jinghikai ban wad ki buit ki lad kumno ban ioh kam bad ban lah pynmih pisa hi haba iadei bad ki rukom shna ïing shna sem. Da kaba u ai buit ban iatreilang bad ka ophis jong u Deputy Commissioner naka bynta ban wad ki lad ki kabu ban iashim bynta ha ki projek sorkar ba shakhmat.