Hiar jurip u heh NEC bad ki ophisar ia ki projek ban kyntiew ia ki nongrep ha Jaintia

U Secretary ka North Eastern Council (NEC) u Satinder Kumar Bhalla hynne ka sngi u la leit jngoh ha West Jaintia Hills district ban bishar bniah ia ka jingiaid shaphrang jong ki kam hapoh ka projek USP, Integrated Lakadong Turmeric Project.

Ia u Secretary la synran lang da u Dr. Sentitula, IFS uba dei u Director (Tourism & Industries) NEC u Pranjal J. Dutta, Joint Managing Director ka Meghalaya State Agriculture Marketing Board jong ka Sorkar Jylla bad ki ophisar na ki ophis jong ka District Horticulture Officer, ka District Agriculture Officer bad ka Meghalaya Basin Management Agency (MBMA)

Ha kane ka jingleit jngoh na ka liang jong u Secretary ula jurip ia ka jaka kaba don ha ka shnong Thadmuthlong C. Phramer lane ka jingshna ia ka Centralized Processing Unit. Ka kynhun pyntreikam ka la pyni ia ka rukom shna bad iathuh halor ka jingpynkhreh ia ka jingiaid ki kam. Ka kynhun ka la pyntip sha u ba ki enjiniar bad ki nongtrei ba tbit ki dang pynkhreh ia ki plan bad ka jingkhein jingdiah ia ka jinglut, hadien kata yn sdang ia ka rukom ai tender .

U Secretary u la iakren ruh bad ki dkhot jong ka Lakadong Turmeric Cooperative union Ltd. Ka Synjuk ka la pyntip sha u halor ka jingiatreilang jong ka bad ka tnad ka rep ka riang na bynta ban pyntreikam ia kane ka projek.

Ka Synjuk ka la pynpaw ka jingsngewskhem ba ka Curcumin Extraction Unit kan kyntiew ia ka rep ka riang bad kan nang pynlah ia ki nongrep ban ioh ia ka dor kaba kham bha na ka bynta u shynrai Lakadong bad kan kyntiew ia ki lad kamai na ka bynta ki jaidbynriew nongrep ha kylleng ka thain Jaintia.

Na ka liang u Secretary ula ai jingmut ruh ban pyntreikam ia ka Batch-coding ban pynkhlain ban lah ban wad bniah bad ban pynsuk ia ka jingtreikam jong ki kam khaii.

Kum shibynta jong kane ka jingleit jurip na ka liang u Secretary ula leit ban jurip ia ka Bio-curcumin Extraction Unit ba la pyniaid da ka LIFE Spice Processing Cooperative Society Ltd. kaba don ha ka shnong Laskein.

Hadien ka jingleit jurip, u Secretary ula ai jingmut ia ka kynhun pyntreikam ban shim ia ki jinghikai na ka unit kaba la don lypa katba ki dang thmu bad pyntreikam ia ki projek kiba kum kita.

Ula ban jur ia ka jingdonkam ban ithuh bad ioh ia baroh ki jingmynjur ba donkam jong ki jingpynshisha bad ki jingbud ryntih ia ki kyndon ryngkat bad ka jingpynroi ia ki jingtei bad ka jingbuh ia ki mashin.