Ka BJP kam ju pynurlong ïa ki jingkular : Pala

U President ka Meghalaya Pradesh Congress Committee (MPCC) u Bah Vincent H Pala uba long ruh u kyrtong ban iakhun ia ka elekshon shiteng samoi jong ka MP Lok Sabha na Shillong Seat, ula ong ba ki MLA ka UDP kiba la leit ban pyniasoh noh bad ka BJP da ka jingthmu ba kan pynurlong ia ki jingkular, hynrei ka BJP kam ju pynurlong satia ia ki jingkular.

Ha kaba iadei bad kaj ingleit pyniasoh 8 ngut ki MLA ka UDP sha ka BJP bad 3 ngut sha ka NPP, u Bah Pala ula ong, kiba bun kila leit pyniasoh sha ka BJP namar ka jingkyrmen ba ka BJP kan pynurlong ia ki mat jingdawa, hynrei um ju iohi ba ka BJP kan bat iala ka kular.

Ula ong, lada ki jingkular kim don, kumta kin sa iaid ha kajuh ka lynti kumba ula ong ia ki MLA ka TMC kiba la leit iasoh da ka jingkyrmen kaba khraw hynrei haba kut, ym don uwei ruh uban wanphai pat lait noh tang uwei lane arngut, kajuh kan sa jia ia ki MLA ka UDP kiba la phet seng.

U Bah Pala ula ong “3 ngut kila leit pyniasoh sha ka NPP bad phi iatip bha ba na kine ki laingut, u Bah Paul u dei u Myntri bad nga ju ong ba u Bah Paul u dei u Sing ba mynsaw hadien ba ula shah siat hala ka jong ka party haba sdang da u khnam bad ryntieh bad hadien ula pyniasoh sha ka UDP hapoh ka bom bad ula treikam bha hynrei sa shisien ula shah siat bad ula dei u sing ba mynsaw, kumta to ngin peit kumno une u Sing yn leh ha ka NPP, Nga khmih lynti ba un treikam bha, un long Myntri ne em, ia kata ngin sa iohi”.

Ula ong ba ka seng Congress kala mad ia ka jingeh kaba khraw haba ki heh ka seng kila mih bad phet seng noh shawei hynrei ula banjur ba ka seng suki pa suki kala nang khlain bad ki paitbah ki dang shaniah tylli ha ka seng Congress.

Ula ong, ba ka sorkar kaba la synshar da ka BJP kala pulom bha ha kaban aikam aijam, ka jingbym don ka shongsuk shongsaiñ, ka jingshah ktah ka pule puthi na ka jingkhang ia ki skul bad ka jingpynlong ia ki jingiakhih ha ka ri.