Ka Party ba synshar ha KHADC kam shym treikam kumba kular ia ki paidbah:Sñiawbhalang

U symbud myntri ka sorkar jylla u Sñiawbhalang Dhar ha ka jingialang pan jingkyrshan na ka bynta u Dr.DRL Nonglait kyrtong ka NPP na ka bynta ka election shiteng samoi ba la pynlong ha Madan Wahriong Lumpyrtuh Mihmyntdu haka miet 22/10/2026, ula pynsngew ruh ia ki kam ba bha ba la leh ka sorkar ha kylleng ki jaka ka Jylla nalor kiwei pat ki project ban sa pyntrei. U iaroh ruh ia ka roi ka par hapoh ka 2-Jowai Constituency da kaba ong haba jied ia u nongmihkhmat ba don jingkitkhlieh na ka bynta u paidbah iohi ruh ia ka jingkiew ka roi ka par.

Halor ka jingshah kynthoh ka NPP u Sñiawbhalang u ong, ki briew ba heh tang ka ktien dei kiba khlem kam, da kaba ai nuksan ia u khiew ba dap um bad ba thylli. Ha kajuh ka por ula ai nuksa ruh ia ka political party ba synshar ha KHADC hadien ba ka la ioh ia ka bor, ka treikam mar khongpong ym kumba ka la kular ia u paidbah shwa election.

U kyntu ia ki paidbah ban long kiba stad ban bishar ym ban ngop ha ki jingpynbeij kiwei kiba im tang ha ka beiñ sorkar, ba lada trei ka sorkar ruh beiñ lada ym trei ka sorkar ruh beiñ. U ong lada ngop ki paidbah ha kum kita ki nongialam bym sngewthuh tang wat ia kaei ba kila kren hi ruh shari yn poi ka ri ka jaitbynriew bad kiba kum kita kim biang hi ruh ban long nongialam.

“Nga la long MLA 19 snem kaba sniew kaba bha nga la ioh lut, nangta ka jingshah krenbeiñ ruh ha ban da biang, ki jingiaroh ruh ha ban da biang hi, tangba nga la rben ka snieh ngam pynsngap shuh ia kita”. Ong u Sñiawbhalang Dhar.

Ki briew kwah ai daw pat ki iohi tang ia kaei bym leh ka sorkar ia kaba leh pat ka sorkar pat kim iohi.

“Kiei kiei ba leh ki nongmihkhmat ne ka sorkar dei naka bynta ka lawei ki khun ki kti, hynrei lada ki paidbah pat kim long kiba pyrkhat jngai haba jied iaki nongmihkhmat, ka jingduhnong ba nyngkong dei iaki hi”.

U ong ruh ba ha u hi shimet u ngeit ba ymdei ban shim ia kano kano ka rai ba biang lut, hynrei ban shim iaka rai da ka ban don iaka mynsiem ban pynbiang pynbha khnang ban im u paidbah.

Ka roi ka par ba wanrah ka sorkar kumba long mynta lei dei kaba biang tam iaka Jylla bad ka lawei ki khun ki kti da kaba ai nuksa iaka kam jngohkai haka Jylla ba haka shisngi ym duna ia 7000 tylli ki kali ba wan shangkai ha Jylla Meghalaya bad ha man kawei pa kawei ka kali don 4, 5 ngut ba shong kaba mut 30 hajar ngut shisngi ym duna. Te lada ki pyllut 1000 tyngka ha Meghalaya pyni 3 klur shisngi ioh nong ki paidbah ka Jylla.

Hynrei ia kane ruh don bym ñiewkor da kaba pyrshah ia kiba wan nabar, ba haka jingshisha kiba nabar ruh donkam hi ba kin wan shaka Jylla da kaba don u pud.

U ong ruh ba mynta ia kano kano ka jingthmu wanrah iaka roi i par la don beit kiba pynthut bad kiba kmen, da kaba u iaroh iaka Rilum Jaiñtia kaba bunsien Hi dei kaba pdiang iaka roi ka par.

Haba khot kyntu iaki paidbah ban ai jingkyrshan ia u kyrtong ka NPP u ong, ka pyrthei dei kaba rit bad tawiar sawdong kumta donkam ban iatylli para mangi khnang ban kiew ka jaitbynriew.

Halor ka jingjied pat ka party ban pynieng da u Dr.DRL Nonglait ha kane ka bye election u ong namar ba ki iohi ba dei u briew ba biang . Kumta ula kyntu ruh iaki paidbah ban jied ia u Dr.Nonglait namar ba u dei u briew ba biang bad uba don haka lo liang synshar.