Ka jingwan pyniasoh ki MLA kan nang pynkhlain ia ka Party ha ka ielekshom MP”

Ki nongialam jong ka National Peoples Party (NPP) hynne ka sngi ka la pdiang burom ia 3 ngut ki MLA ka UDP ba wan ban pyniasoh sha ka seng ha ka jingialang ha ophis treikam ka NPP ha nongbah Shillong.
Ki lai ngut ki MLA ka UDP kiba la wan pyniasoh sha ka NPP ki kynthup ia u MLA ka West Shillong u Bah Paul Lyngdoh, u MLA ka Mawkyrwat u Bah Renikton Lyngdoh Tongkhar bad MLA ka Mookaiaw Bah Nujorki Sungoh hynrei um shim la lah pat ban poi namar ba um don ha ka met kaba koit ba khiah.
Ia kine ki MLA ryngkat abd ki nongialam bad nongkyrshan ki jongki, la pdiang sngewbha da u National President ka NPP bad Myntri Rangbah ka Jylla u Conrad K Sangma ryngkat ka jingdonlang ki Nongialam ka NPP kiba long ruh ki Symbud Myntri Rangbah kiba kynthup ia u Bah Prestone Tynsong bad u Bah Sniawbhalang Dhar, ki Myntri Sorkar, MLA, MDC bad ki nongialam ka NPP.
Haba kren ha ka jingialang u Conrad K Sangma ula ong, “Nga pdiang sngewbha ia u Bah Paul, Bah Renikton bad Bah Nujorki bad ngam kwah ban khot ia ki kum ki riew thymmai namar ngi lah don ia ka jingiadei bad la rim bha. Ka kyntien ‘thymmai’ kam pynpaw hok ïa ka jingïalong paralok bad ka jingïadei kaba ngi la don. Mynta ka sngi ka long ka sngi kaba ba kongsan bha ïa ngi kum ka party”.
U Myntri Rangbah ula iathuh ba u Bah Nujorki Sungoh u dang don hapdeng ka jingsumar bad un sa wan iasoh ha kine ki khyndiat sngi ban wan.
U Conrad ula ong “Nga iohi ia ka dur ba naduh ka 24 tarik Nailar 2012 ha ka ophis barim jong ngi (NPP) ha Lachumiere. Nga don kumba 15,000 tylli ki dur barim bad haba nga peit, Nga iohi ia u Bah Renik hapdeng ki paidbah la 14 snem mynshuwa, ka sngi ba la thaw ia ka NPP ha ka Jylla. Ban khot ia u kum u riew thymmai kam long kaba shonghok satia. Kane kam dei tang halor ka jingnang khlain ka seng. Nga sngewkmen bha ban iohi ia ki briew kiba nga sngewtynnad eh ban ioh ban iatreilang noh. Ngi pyrkhat kumjuh bad kwah ban leh ia ki kam ha kajuh ka rukom. Na ka bynta ka longiing ka NPP, Nga pdiang ia phi sha ka iing jong ngi bad khmih lynti ban ia shakri lang ia ki paidbah”.
Ula ong ruh, ba ki briew ki pyrkhat ba ngim don satia ia ki jingiapher jingmut, hynrei kane kam dei ka jingshisha. Ki don shibun ki kam kiba ngim iamynjur lang, ki don ki por ba ngi iashrut, hynrei ngi iashrut hapoh ka kamra, ym sha madan lane ha ki lad pathai khubor. Kane ka jingiasngewthuh jingmut kan pynlong ia kano kano ka seng ba kan nang khlain. Ha ka synshar khaddar, u Bah Prestone u lah ban nym ia mynjur bad nga, u Bah Sniawbhalang ruh u lah ban nym mynjur, Nga lah ban nym mynjur, hynrei ngi kylli- hato kadei na ka bynta ka jingbha ki paidbah? Lada hooid, ngi leh ia ka. Ngim don satia ia ka jingsngew sarong. Ka jingsngewrit ka long kaba kongsan ha ka sain pyrthei bad ha kano kano ka seng”.
U Conrad ula ong, ba ka jingsngewrit, ka jingiatreilang kum ka kynhun bad ka jingbuh nyngkong eh ia ki paidbah kadei kaba pynlong ia ka NPP kaba kham pher na kiwei pat ki seng saiñ pyrthei.
Nalor kane, ula iathuh ruh ba yn sa pyllait paitbah ia ka phlim halor ka jingim jong u P.A. Sangma (bam kwai ha dwar u Blei) u nongseng ia ka National People’s Party (NPP) ha ka nongrim ban pynmih ia kawei ka sur jong ka thaiñ shatei lammihngi ka ri bad ban pynneh ia ka jinglong tynrai bad ia ki mat jong ki paitbah ka thaiñ.
Katba u Bah Prestone ula ong, ba ka jingwan pyniasoh kine ki MLA ka la nang pynkhlain shuh shuh ia ka seng bad khamtam ha ka jingpynkhreh ia ka jingiakhun ia ka elekshon shiteng samoi jong MP Lok Sabha ban pynthikna ba u Dr DRL Nonglait un jop donburom ia kane ka elekshon.
Ula kyntu ia ki nongialam ka NPP kiba la don lypa ha kitei ki 3 tylli ki Constituency ba kin iatreilang bad ki nongialam kiba la wan ban pyniasoh mynta khnang ba ka seng kan khlain arshah bad kan lah ruh ban bteng ban ai ka jingshakri kaba bha ia ki paitbah.