Rakhe ka WKH ia jingdap 50 snem ka jingiaid lynti bad ka pateng ban wan Nongstoin

Ka District jong ka West Khasi Hills mynta ka sngi ka la rakhe ïa ka jingdap 50 snem jong ka, kaba la tip kum ka Golden Jubilee, hapoh ka phang pdeng “West Khasi Hills at 50 and Beyond”, kaba pyni ïa ka jingïaid lynti jong ka District ha kine ki san phew snem, ryngkat bad ki jingjop, ka jingriewspah jong ka kolshor bad ka roi ka par.
Ïa kane ka jingïarakhe kaba la iaid mynta shibnai lynter la pynlong ha madan New Nongstoin ha kaba la pynlong ïa ki prokram ba kynthup ïa ki jingïalang bapher bapher, ki jingshad tynrai, ki jingshad bad rwai, bad ki prokram pynbyrngia bapher bapher.
Ïa ka jingïarakhe la plie paidbah da kaba tbeh ïa ka sharak da u kongsan, u Bah Gabriel Wahlang, MLA ka Nongstoin, ha ryngkat ka jingïadonlang jong u symbud kongsan, u Bah R. G. Momin, ka Deputy Commissioner jong ka West Khasi Hills, ka Hema Nayak, bad ki MDC jong Nongstoin bad Mawshynrut ba kynthup ia u Dr. Juristman Iawphniaw bad Bah Srally Rashir.
Kawei na ki mat ba kongsan jong kane ka jingïarakhe ka long ka jingpyni ïa ka jingïaid lynti jong ka West Khasi Hills ha kine ki 50 snem, kaba pynpaw ïa ka histori, ka kolshor tynrai, ki jingjop bad ki kam pynroi bapher bapher kiba la wanrah ïa ka jingkylla ha ka District.
Ha kane ka sngi, kum ka dak jong ka jingsngewnguh ïa ka jingnoh synñiang jong ki ha ka jingïaid lynti jong ka histori ka jylla, la pynkup burom ruh ïa ki riewialeh kiba la ïashim bynta ha ka jingïakhun na ka bynta ban ioh ia ka jylla ba pura ne kita ki Hills State Fighters.
Shuh shuh, ha katei ka sngi la ioh ban pyllait ruh ïa ka Golden Jubilee Souvenir, kaba kynthup ïa ki jingkynmaw ia ki bynta ba kongsan jong ka jingïaid lynti jong ka District ha kine ki san phew snem. La pynlong ruh ïa ka jingsam khusnam sha kiba jop ha ki jingïakop thaw ïa ka theme song bad ka logo jong ka Golden Jubilee.
Nalor ki prokram paidbah, la pynlong ruh ïa ki jingshad bad ki jingrwai tynrai, ki prokram pyni ïa ki jain tynrai jong ki jaitbynriew bapher bapher, kiba la pynkhreh da ki nongshna jain na ka District, ka beatboxing, ki jingïakop tem guitar ha ka kyrdan State Final, bad ka tem ka rwai kiba la wanrah ïa ka jingsngewkmen bad ka jingïashim bynta jong ki paidbah.
Kane ka jingïarakhe Golden Jubilee ka long shibynta ban kynmaw biang ïa ka jingïaid lynti jong ka District ha kine ki san phew snem bad ban burom ïa ki jingnoh synñiang jong ki pateng kiba la leit noh, bad ban pynshlur ïa ka jingïatreilang na ka bynta ka lawei kaba kham bha.
Da ka phang “West Khasi Hills at 50 and Beyond,” kane ka jingrakhe ka pynpaw ïa ka jingangnud ban bteng ïa ka roi ka par, ban pynneh pynsah ïa ka kolshor tynrai bad ban tei ïa ka lawei kaba kham phyrnai na ka bynta ki pateng ban wan.
Ha katei ka sngi na ka liang ki kongsan ki la sam ruh ia ki symboh jingkren halor ka jingiaid lynti jong ka District bad ka jingjop jongka ha kiba bun ki liang ryngkat ka roi ka par.