Dap 50 snem ka EGH, buh Mawnongrim u Conrad T.53 klur ki kam pynroi

U Myntri Rangbah ka Jylla u Conrad K Sangma hynne ka sngi ulsa iashim bynta ha ka jingrakhe ia ka jingdap 50 snem jong ka East Garo Hills District ba la pynlong ha Rongrenggre Government Higher Secondary School bad ha kane ka jingrakhe u Myntri Rangbah ula plie bad buh maw nongrim ia ki kam pynroi ba T.53 klur.

Ha kane ka jingrakhe la iadonlang u Myntri Sorkar u Marcuise N. Marak, u Deputy Commissioner, Superintendent of Police, East Garo Hills, ki ophisar jong ka district, ki MDC, Nokma, nongialam niam, nonghikai bad ki khynnah pule.

U Myntri Rangbah ula pynkup burom ruh ia ki MLA barim, ki MDC, ki nongshong shnong ba pawkhmat, ki Nokma bad la sam ruh ia ki sertiphiket jong ka MSSDS sha ka District Prison and Correctional Home na ka bynta kito kiba la pyndep ia ka jingioh jinghikai pyntbot hapoh jong ka CM Skills Mission bad sha kiba la ioh jinghikai ha ka kam otdieng jongka SHG Kusim Rongmitel bad kiwei kiwei.

Haba kren ha ka jingialang u Myntri Rangbah ula ong, ba ka prorkam kadei ka dak jong ka jingrakhe ia ka Jubili Ksiar jongka Williamnagar bad wanrah ia kiba bun ki jingtuklar kiba pyni ia ka jingkiew jong kane ka thain kum ka jaka synshar kaba kongsan, ka shlem jong ka pule puthi bad ki kam pynroi ha East Garo Hills.

Nalor kane ula kdew ruh ia ka jingnoh synniang jongki nongialam kiba pawnam kum u Willliamson A Sangma, Choronsing A Sangma, Lolith R Sangma bad Rev M Marak kaba ka jingnoh synniang ka jongki kala lam sha ka jingthaw ia ka East Garo Hills district bad ula ai khublei ruh ia ki Nokma kynthup ia u Tiren Sangma, Chingban Sangma, Asin Marak, Dingnang Sangma, Mison Sangma kiba la noh synniang ia ki jaka ban tei ia ki ophis sorkar ki bapher bapher bad ula ai khublei ruh ia baroh ki dkhot kiba rim bad kiba mynta jong ki shnong ki thaw, ki bor pyniaid district bad ia ki nongshong shnong jong ka East Garo Hills halor ka jingnoh synniang bad ka jingshakri ka jongki.

Ha shwa kane u Myntri Rangbah ula plie ia ki jingtei kiba thymmai ha Williamnagar Higher Secondary School bad ula iakren ruh bad ki nonghikai bad ki khynnah skul.

Ka jingplie ia ka Williamnagar Higher Secondary School bad ka jingtei ia ka Multi-Purpose Indoor Sports Hall kala pynkhlain ia ki artylli ki bynta kiba kongsan na ka bynta ki khynnah kane ka thaiñ ban ioh ia ka pule puthi kaba bha bad ki lad ban ioh ialehkai bad ban tei ia ka sap ka phong.

Ula leit ruh ban jurip ia ka Multi-Purpose Indoor Sports Hall kaba ka kam ka dang iaid shakhmat kaba kot T.9.40 Klur bad ula iakren bad ki nongialehkai bad sngap ia ka jingeh ka jongki bad ula pynshlur ia ki samla ba kidei ban iashimbynta ha ki jingialehkai.

U Myntri Rangbah ula kren ruh halor ki projek bapher bapher kiba la pyntreikam ha kane ka district bad kumjuh ruh ia ki projek kiba dang pyniaid shakhmat ban kyntiew ha ki liang ki bapher bapher.

Ula plie ruh ia ka jingshna pynheh ia ka surok ha Williamnagar kaba 13.989 km kaba la bei tyngka da ka World Bank kaba T.26.92 Klur, ka jingpynheh ia ka Rongrenggre Simsanggre Nengkhra Road, 10th to 16th km (RIDF XXVIII) kaba T.15.98 Klur, ka Interlocking Concrete Block Road ha Williamnagar kaba 4.40 km ha ka jinglut kaba T.4.70 Klur, ka Jingkieng Rongongre bad buh ia u mawnongrim ban tei ia ka MIG Buildings ha Williamnagar kaba T.3.61 Klur, ban tei ia ka Commandant’s Office Building jong ka 5th Battalion, Meghalaya Police (3rd IRBn) ha Samanda, East Garo Hills ha ka jinglut kaba kot T.2.63 Klur bad kiwei kiwei.