Ïaroh ïa u Lat ïa ka Indian Red Cross Society

U Lat ka Jylla Meghalaya u CH Vijayashankar hynne ka sngi, ula pyniaid ia ka jingialang jong ka Annual General Meeting ka Indian Red Cross Society (IRCS), Meghalaya State Branch, ha Lok Bhavan, Shillong, kum u President jong kane ka Society.

Ha kane ka jingialang la wan ban iashimbynta lang da u HC Chaudhary uba long u Additional Chief Secretary jong u Lat ka Jylla bad u Paiem Laborious Manik S. Syiem uba long u Chairman jongka Indian Red Cross Society, Meghalaya State Branch.

Kane ka jingialang kala iakren halor ki 4 tylli ki mat, kaba kynthup ia ka jingpynskhem ia ki rai kiba la shim ha ka jingialang ka AGM kaba la long ha ka 3 tarik u Nohprah 2025, ka jingpyni bad ka jingmynjur ia ka Annual Report jong u snem 2025-26, ka jingmynjur ia ka Audited Financial Report jong utei u snem bad ka jingai jingbatai halor ka jingtyrwa ban tei ia ka ophis bathymmai jong ka Society.

Haba kren ha ka jingialang u Lat ula iaroh ia ka Indian Red Cross Society (IRCS), halor ka jingtrei borbah ban ai jingshakri ia ki parabriew bad ka jingiai bteng ban weng ia ki jingeh kaba mad da ki briew. Ula pynshlur ia ka Society ba kan pynkhlain ia ki prokram ki jongka, ban pyndonbynta shuh shuh ia ki ‘Volunteer’ khamtam eh ia ki samla, khnang ba ka khubor jong ka jingai jingshakri ia ki parabriew kan saphriang sha man la ki jaka kiba don ha kyndong kynshrot jong ka Meghalaya.

Ula banjur ruh ia ka jingdonkam ban shimkhia ia ki mat kiba ktah ia ka imlang sahlang bad ki jingsngewkhia ia ka mariang, kynthup ka jingpun khun ki khynnah, jingpyndonkam ia u drok, ka jingshah ktah jong ka sawdong sawkun na ka jingrep thik tang shi jait u jingthung bad ka banjur ia ka jingkongsan ban iatreilang ban iada ia ka bha ka miat jong ka imlang sahlang bad ban iada ia ka mariang.

U Lat ula ai ruh ia ka jingkyrshan ia ka jingtyrwa ban don ia ka ophis treikam kaba thymmai jong ka Society, da kaba pynpaw ba dei ban don ia ka jaka treikam kaba kyrpang kaban iarap ha kaban don ia ka jingiatreilang halor ki kam kiba iadei bad ki parabriew, ban pynlong ia ki prokram ai jinghikai bad ka shimkhia mardor haba don kino kino ki jingjia bad ka jingdonkam jong ka imlang sahlang bad ula kyntu ia baroh ban ai iaka jingiatreilang bad jingkyrshan ban pynurlong ia katei ka projek.

La pynkut ia kane ka jingialang da ka jingseiosh, lyngba ka jingiakren halor ki mat bapher bad ban sam ia ki jingmut jingpyrkhat na ka bynta ki kam kiba seisoh bad kumjuh ruh ia ki kam kaba ka Society ka dang dei ban trei nangne shakhmat.

Ka jingialang kala iengskhem ruh ha ka jingkular ka Indian Red Cross Society, Meghalaya State Branch, ban pynkhlain ia ki kam ban ai jingshakri ia ki parabriew bad ban trei met bad mynsiem na ka bynta ki paitbah ka Jylla Meghalaya.