U Myntri Rangbah ka Jylla u Conrad K Sangma ryngkat lang bad ka Chief Justice jongka High Court of Meghalaya, ka Justice Revati Mohite Dere, hynne ka sngi kila buh ia u mawnongrim ban tei ia ka National Law University, Meghalaya bad ia ka Meghalaya State Judicial Academy ha Mawpdang–Mawkhanu, New Shillong Township.
Haba kren ha ka jingialang u Conrad K Sangma, ula ong ba u mawnongrim u long kum ka dak jong ka jingiaid shakhmat jong ka National Law University ka Meghalaya bad ka Meghalaya State Judicial Academy na ka jaka kaba shipor ban ioh syndon noh da ka jaka kaba pura ha Mawpdang–Mawkhanu, kaba ka Sorkar Jylla kala dep ban aiti ia ka jaka kaba 65 akar na ka bynta kine ki ar tylli ki jaka pule ha ka 30 tarik u Risaw 2023.
Ula ong, kane ka jaka pule kaba pura kan don ia ka jaka kaba kyrpang ha kaba iadei bad ka jingpule ia ka aiñ, jingwad bniah, jingioh jinghikai ha ka kam aiñ, library, ki kor digital bad ki jingiakren bad ki riewstad bad kine ki artylli ki jaka pule kin ai jingshakri ha ki rynsan bapher hynrei kin iaid pat ha kajuh ka lynti.
U Conrad ula ong “Ka University kan pynkhreh ia ka lawei ha kaba iadei bad ki nongsaid aiñ bad ka Academy kan ai ia ka jinghikai na ka bynta ki Judicial Officer kiba ai jingshakri”.
U Myntri Rangbah ula ong, ka Meghalaya ka don bun tylli ki National Institution bad ka NLU Meghalaya kala bynrap shuh shuh ia ka jingpule ia ka aiñ sha katei ka thup kum ka jingdon ia ki jaka pule ha ka Technology, Management, Design bad Medicine bad pyniar ia ka lad kiba don khnang ba ki samla ka jylla kin ioh ban jied ia ka jingpule ka jongki.
“Ka kamram ba kyrpang ka jongki kadei ban kynthup ia ka jingwad bniah ne Research halor ka riti ka dustur, ki ain bad ki jingleh jong ki jaidbynriew riewlum, ki Legal Aid Clinic bad ka State Legal Services Authority, Moot Courts, ka jingiadonbynta bad ki iingkashari, ki nongiasaid aiñ bad ka imlang sahlang” ula ong u Conrad bad ka ong, ka Academy kadei ban ai ia ki jinghikai kiba ryntih bad kiba iai bteng ia ki Judicial Officer, da kaba pynleit jingmut ha ka jinglong hok bad ka jingiengskhem ha ka nongrim, ka rukom iatai halor ki aiñ ki kanun, ki aiñ thymmai halor ki kam bymman, ka rukom pyniaid ia ki iingkashari bad ki kor teknoloji.
“Kine ki artylli ki jaka pule kidei ban pynneh ia ka bor ka jongki bad ban iatreilang lyngba ka jingai jinghikai, jingialang, jingwad bniah, jingpynmih ia ki kot bad ki jingiakren bad ki riewstad bad kane ka jaka pule kaba pura kadei ruh ban pyniasoh ia ka jinghikai halor ka aiñ, jingwad bniah, jingai jinghiaki ia ki Judicial Officer bad ka jingai ia kaj ingbishar kaba hok ha ka jylla” ula bynrap.
Ka Chief Justice ka Revati Mohite Dere, kala ong ba ka University bad ka Academy kila ai ka jingshakri kaba biang ha kaban ai ia ka jingbishar kaba hok. Ka University kan pynkhreh ia ki nongiasaid aiñ kiba tbit, katba ka Academy kan pynleit jingmut ha kaban pynkhlain ia ka sap bad ia ka jingstad jong ki briew kiban khmih ia ka aiñ.
Ha kane ka jingialang buh mawnongrim la iadonlang u Myntri ka tnad aiñ u Bah Lahkmen Rymbui, ki Nongbishar jong ka High Court kiba kynthup ia u Justice HS Thangkhiew, u Justice W Diengdoh bad u Justice B Bhattacharjee. U Justice Sanjib Banerjee u Chief Justice barim jongka High Court ka Meghalaya, Prof Dr Jyoti Jajodia Mozika, VC ka NLU Meghalaya bad ka Director jongka MSJA ka Kong Kerpa Lyngdoh Nongbri.