Kyntait ka khynnah ban shongkha wat la pynbor ki kmie ki kpa ba kwah pyndep jingpule

Ka khynnah skul kaba kyrteng ka Ibawan ka la kyntait ia ka jingpynbor ka kmie u kpa ban shong kurim noh katba ka dang pule namar ba ka kwah ban pyndep ia ka jingpule kaba biang.

Kane ka la pynbitar ia ka kmie u kpa bad ki hymmen para haduh ba la wan ban pynsngewthuh lem ka nonghikai bad ban pynshai u Rangbah Shnong ba ka jingpynshong kurim ia ka khynnah ka long pyrshah ia ka ain.

Kane ka la pyllait im ia ka Ibawan pat ban bteng ia ka jingpule jong ka.

Ia kane ka drama la pyni da ki khynnah skul ha ka jingrakhe ia ka sngi ka khynnah, ka jingpynkut noh ia ka jingshongkha khynnah mynta ka sngi ha Tirot Sing Memorial Hall, Pyndengumiong, Mairang, Eastern West Khasi Hills kaba la pyllong ka District Social Welfare, ka West Khasi Hills.

Khnang ban tehlakam ia ka jingshongkha khynnah kaba la ktah jur ia ka met ka kynthei bad kumjuh ia ka longiing longsem, bad ka imlang sahlang, ka District Social Welfare, ka West Khasi Hills ka la lum lang ia ki khynnah skul na ki skul bapher bapher kiba hap ha Eastern West Khasi ban pynsngewthuh ia ka jingsniew ka shongkha khynnah ha kane ka jaitbynriew.

Ka Deputy Commissioner ka Eastern West Khasi ka Kong Anita Kharpor ka la long kum ka kongsan, kaba la pashat ia ka jingmut naduh ka mynsiem ba ki khun kynthei ki dei ki jingai ba kyrpang u Blei bad kam dei ka mar kaban pyndonkam kum kiwei ki jingthaw. Ka la ong ba ka shi bor ka kynthei ka kham khlain bor ia ka 12 bor ki rangbah namar bala ai kyrpang u blei.

Ha kajuh ka por ka la pynpaw ia ka jingsngewkhia ia ka jingkynrei ka jingshong kha khynnah bad ka la ai mynsiem ba kin long kiba shlur bad ban ym ieh ia ki jingpule shiteng por.

Katba ka heh pulit, ka kong B Nongrang, ka la pynshai ba ka jingshong kha khynnah ka long pyrshah ia ka ain bad ki shynrang kiba shongkha ia ka kynthei hapoh 18 snem, ha jaka ba kin leit sha iing ka kynthei ban bsa ban pjiah ia ki khun bad ia ka lok, kin hap leit shong sha phatok.

Ka la kyntu ba ki kynthei kim dei ban ngop ha ki jingshah riam ne shah pynbor ban shongkha ne ban kyrkieh ban iapoi khynnah namar ba ym tang ba ktah ia ka jingkoit jingkhiah ka met, hynrei ka longiing kan shah shong kulai ruh ha ka jingduk.

Ha kane ka sngi, la ioh ruh ia ka jingsam ia ki sanitary pad, ki vending machine sha ki skul na ka District Social Welfare.

Ka kong D. Pakyntien, ka District Social Welfare Officer ka West Khasi Hills ka la ong ba ka jingiada ia ki khynnah ban lait na ka shongkha khynnah, kam dei tang ka kamram ka sorkar ne ki kmie ki kpa hynrei ka dei ka kamram jong ka imlang sahlang baroh kawei.

Ka la kyntu ia ki kmie ki kpa ba kin hikai ia ki khun jongki, ban pynduh pyndam ia ki khun ban shongkha hapoh 18 snem hynrei ban phah sha skul ba kin ioh ia ka jingstad ba kin lah ban ieng ha la kajong ka kjat.

Kumjuh ka nonghikai ka kong Ibandahun Lyngdoh Lyngkhoi ka la ong ba ha kane ka juk mynta ka la kynrei bha ka shongkha khynnah bad ka long ka jingpang ha ka imlang sahlang namar ba ka la shim noh ia ka lawei jong ki kynthei, kaban wanrah pat ia ka jingeh ha ka iing ka sem bad ka imlang sahlang. Ka la ong ba ki kmie ki kpa ki dei ban theh bad pyllut bha ban tei ia ka lawei ki khun kynthei khnang ban pynkhlain ia ka iing ka sem bad ka imlang sahlang.

Katba na ki khynnah samla kila sngew ba ki kmie ki kpa ki dei ban sneng ban kraw bha ia ki khun ban sangeh na ka shongkha khynnah bad ki khynnah ruh ki dei ban sngap ia ka jingsneng ki kraw ki kmie ki kpa bad ki dei ban don ka thong ban pule haduh ban ioh ia ka jingnang jingstad, ym ban kynrup lok noh.