Ha ka juk AI bad Robotics, ki samla ki dei ban trei shitom ban ïakhun ïa ki jingkylla ka pyrthei

Ban pynshlur ïa ki samla pule khlem da kheiñ ïa ka jinglong jingman jong ka longïing ne ki jingeh kiba ki mad ha ka jingim, ka Raid Laban Sports, Social & Cultural Organisation (RLSSCO) ka la pynkup burom haduh 314 ngut ki samla pule na South Shillong Constituency ha ka 23rd Meritorious Awards.

Ka jingpynkup burom ha kane ka sngi ka long kaba kyrpang namar ka Organisation kam shym la pynleit jingmut tang ha ki samla pule kiba pass bha, hynrei ka la ai jingithuh ruh ïa ki samla pule kiba wan na ki longïing kiba duk, kiba la lah ban bteng biang ïa ka jingpule hadien ba ki la sangeh shiteng por bad kito kiba don jingduna ha ki dkhot met.

Na kine ki 314 ngut, 45 ngut ki samla pule kiba la pass bha ki la ïoh pdiang ïa ki laptop kum ka jingai mynsiem ban bteng ïa ka jingpule bad ban pynroi shuh shuh ïa ka jingtip jong ki.

Haba kren ha kane ka prokram, u Kongsan, Dr. Vijay Kumar D., IAS, Commissioner bad Secretary ka Sorkar Jylla, u la ong ba ha ka juk jong ka Artificial Intelligence (AI) bad Robotics, ki samla ki donkam ban long kiba trei shitom bad don ka mynsiem ïakhun kaba khlaiñ khnang ban lah ban ïakhun ïa ki jingkylla jong ka pyrthei.

“Ka pyrthei mynta ka kylla sted bha. Ngim tip hadien san ne shiphew snem ki jait kam aiu kin don. Hynrei watla ka don ka jingbym thikna, hynrei ka don ruh bun ki lad ki kabu kiba thymmai,” u la ong.

U la ban jur ba ka jingtrei shitom ka long ka nongrim jong ka jingjop, da kaba kdew ïa ka jinghikai jong ki 10,000 kynta, kaba pyni ba u briew u donkam ban pynlut por bad trei shitom ban long uba tbit ha kano kano ka kam.

U Dr Vijay Kumar u la ong ruh ba ki samla jong ka Meghalaya kim dei ban pyrkhat ba ki don ha ka jingeh tang namar ba ki sah ha ka thain Shatei Lammihngi, namar lyngba ka teknoloji ki lad ki kabu ki la plie ïa baroh, khlem da kheiñ ïa ka jaka ba ki sah.

Ha kajuh ka por, u la pynpaw ba ka Sorkar Jylla ka dang trei ban plie lad ïa ki samla ha ki liang ka entrepreneurship, music, crafts, science bad IT, khnang ban ai ïa ki lad ban seng kam lajong bad tei ïa ka lawei.

Na ka liang u President ka RLSSCO, Bah Sanbor Shullai, u la pyntip ba ka Organisation ka la sdang ïa ka jingai jingithuh ïa ki samla pule bad ïa ki briew kiba noh synñiang sha ka imlang sahlang naduh u snem 1987.

Ka jingpynlong ïa kane ka prokram la 23 snem lynter ka pyni ïa ka jingbteng jong ka RLSSCO ban kyrshan ïa ka pule puthi bad ban ai jingithuh ïa ki briew kiba noh synñiang sha ka roi ka par jong ka imlang sahlang.