Ha ka sien nyngkong pynlong jingialang ka Joint Parliamentary Committee halor ka FCRA Bill ha Shillong

U Myntri Rangbah ka Jylla u Conrad K Sangma hynne ka sngi Nyngkong ula pynpaw ia ka jingkmen bad jingsngewnguh ia u Chairman ka Joint Parliamentary Committee on the FCRA Bill u Sanjay Jaiswal uba la wan ban pynlong ia ka jingialang ba nyngkong ha nongbah Shillong hadien ka jingkyrpad ka jong u.

Haba iakren bad ki nongthoh khubor u Conrad Sangma ula ong, “Ba ha ka por ba nga don hapoh ka Parliament ha u snem 2016, nga lah don ia ka jingia dei paralok ba khlain bad u (Sanjay Jaiswal) ryngkat bad kiwei kiwei ki MP, hynrei ngi ju ia hap jingmut bha ruh. Kumta nga sngewkmen ba ula shah thung kum u Chairman jong ka JPC bad u dei shisha u briew uba biang tam namar ba u dei u briew uba shemphang bha, uba lah ih bha ha ka kam bad udei u briew uba sngewthuh ia ka jingsngew jong ka ri hi baroh kawei. Haba ula shimti ia ka kam, nga lah phone mardor ia u (Sanjay Jaiswal) bad nga lah kyrpad ba udei ban wan sha Shillong bad ki kynhun bapher bapher bad ki kynhun niam kiba ioh pdiang ia ki jingiarap na shabar ri, ngi lah ban pynlong ia ka jingialang hapoh ka nongbah Shillong. Ula dap da ka jingkmen bad ula mynjur mardor hi ia kane kaj ingkyrpad, kumta dei halor katei ka jingkyrpad, ba kila don hangne mynta ka sngi bad hynnin ka sngi”.

U Myntri Rangbah ula iathuh ba ula ioh ruh ban iakynduh ia ki dkhot jong ka JPC ha Umroi Airport ha shwa ba kin mih noh na kane ka Jylla.

U Conrad ula ong, ba ula iakynduh ia ki ha kad liengsuin Umroi ha shwa ba kin leit phai noh bad kumta ula ai khublei halor ka jingwan ka jong ki sha Shillong hynrei um shim la ioh lad bha ban iakren bniah bad ki.

“Kaei kaba kongsan ka long ba baroh kiba don bynta ha ka kam kiba don ia ki jingsngewkhia ki la ioh ia ka lad ban pynsngew ia ka jingsngewkhia ka jong ki bad nga lah ioh jingtip ba ka JPC ka long kaba iar jingmut bha bad la ioh ban iakren bniah bha halor ki mat ki bapher bapher bad kala ai por 15 sngi ia ki kynhun ba kin aiti ia ka nongrim bad ia ka jingsngewkhia ka jongki” la ong u Myntri Rangbah.

U la ong ba ki dkhot jong ka JPC, ki la pynpaw ba ki lah sngap ia baroh bad kin sa khmih bniah bha ia ki mat bad kin sa peit ruh kumno ba ngin iaid shaphrang.

U Conrad ula iathuh ba ka kynhun jong JPC kan leit sa sha Chennai bad ha kiwei kiwei ki jaka jong ka South India.