Ki jingdon jingem jong ki Balang ym lah ban kurup, ong ka PCI

Haba pyrshah ia ka kyndon ban aiti ia ki jingdon jingem ba la bei pisa na bar ri, ka Presbyterian Church of India (PCI) hynne ka sngi ka pynpaw ha ka Joint Parliamentary Committee (JPC) ba ki jaka jong ki Balang ha Meghalaya ym lah ban kurup khlem da iaid katkum ki ain ki Autonomous District Council (ADC).

Haba kren sha ki lad pathai khubor u Chairman ka FCRA Committee jong ka PCI u Rev Socratis Diengngan ula iathuh ka kynhun ki 3 ngut ki dkhot ka Balang ki la mih khmat ha ka JPC ha Shillong bad pynsngew ia lai tylli ki mat ba kongsan ka jingslem ban register bad pynthymmai, ka jingeh ban bud ia ki kyndon bad ka jingaiti ia ki jingdon jingem.

“Na ka liang jong ngi, ngi la ai jingmut ia ka lynti kaba kham suk khlem kino kino ki jingeh. Ngi la kren halor ki jingpynslem ban ioh ia ki registration certificate bad jingpynthymmai hapoh ka FCRA. Kiwei ki kynhun ruh kila pynsngew ia kajuh ka jingeh” ong u Bah Rev Diengngan haba iakren bad ki lad pathai khubor hadien ka jingialang.

Halor ki jingdon jingem, ula ong “Ngi ioh ia ki jingdon jingem khyndiat ne pura lyngba ki synniang bala ioh da ka Balang. Ngi la ong ba ngim lah ban aiti ia ki nongkynti jong ngi. Nalor kane ha Meghalaya ka dei kaba hap hapoh ki Autonomous District Council. Ka Sorkar India lane ka Jylla kam lah ban kurup noh ia ki jaka jong ngi khlem da iaid kat kum ki ain ne ki rule jong ki ADC”.

Haba niew ia ka Amendment Rules 2026 kum kaba pyrrkhing arshah ban ia ka Bill, u Rev Diengngan ula ong ba ka jingpyntreikam, lada urlong, dei ban long nangne shakhmat ym ia kaba la leit noh.

“Ngi la kyrpad ia ka JPC ba kan pyrkhat biang sa shisien ia ka Rules bala pynmih jingpynbna bad ban pyndam ia ka Amendment Bill 2026 bad ban pyrrkhat biang ia ka Amendment Rules 2026” ula ong.