Kwah u Conrad ka Library thymmai kan khring ia ki khynnah ban pule kot ban lait na ki Mobile

U Myntri Rangbah ka Jylla u Conrad K. Sangma hynne ka sngi ula plie ïa ka State Central Library ba thymmai bad ïa ka ‘House of Ryndia’ ha Shillong.

Haba kren ha ka jingialang u Conrad Sangma ula ong, kane ka prokram ka lumlang ia 3 tylli ki bynta ka roi ka par ka jylla Meghalaya, kata ban pynneh ki jingtei barim naduh ki pateng hyndai, ban plie lad ia ki paitbah ban ioh ki jingtip bad ki lad pyniaid iew ia ki jain bad ki tiar tynrai ha ki iew. Kane ka long u mawjam ka roi ka par ha ka kam jngohkai ban pynpaw ia ka jinngriewspah ka jylla Meghalaya ha riti dustur bad kolshor.

U la pyntip ka jingkiew ka roi ka par bad ki kam pynroi ki pynleit jingmut halor ki jingtei kum ki surok, ïing skul, hospital bad ki jaka ialehkai.

Ki jingtei ban pynkylla ia ka rukom im ki nongrep ban kyntiew ia ka jingpynmih mar ki nongseng kam lajong ba kin ioh ki iew ba biang ha ka ri bad ka riti ka dustur ha la ki jinglong tynrai, kolshor bad kiwei.

Ula pyntip ka jingpynbha ia ka Library katkum ka juk mynta kan kyntiew ia ki paidbah bad ki samla pule kiba sngewtynnad ban pule kot.

“Ka don ka jingtynruh ban pynlong ia ki Library ba itynnad ba don ki jaka ba biang, kum ki jaka die sha ban pynshlur ia ki khynnah ba kin pynlut por ban pule kot khlem pyndonkam Mobile” ula ong bad bynrap kane kan iarap ia ki samla pule bad kyntu ia ki kmie ki kpa ban iarap ia ki khun ba kin pule thikna ia ki kot.

Ia ka State-Level Living Heritage Arts & Craft Village Festival la pynlong ban pynnam ia ki jingshna tynrai, kynthup ki jain, tiar tem, jingbam bad kumjuh ka ktien ka thylliej bad shaphang ka jaidbynriew ha kylleng ka Meghalaya.

Ia ka Iing Ryndia (House of Ryndia) ka plie lad ia ka rynsan Digital na bynta ki nongpynmih jain tynrai ka jylla ba kin ioh ka jingpyniasoh bad ki iew ba biang.

Ia ka State Central Library la tei ha ka 19 tarik u Kyllalyngkot 1974 kum ka State Public Library jong ka Meghalaya hapoh jong ka Directorate of Arts and Culture.

Mynta lah palat 50 snem, ka Library ka la ai jingshakri ia ki khynnah pule, ki heprit, ki nongwad bniah, Scholar, nongtrei sorkar, ki nongtrei ba la shongthait na ka kam bad kiwei kiwei ki nongpule.

Haduh ka 1 tarik u Lber 2026, ka State Central Library ka don 2 lak tylli ki kot bapher bapher, ryngkat bad ki Magazine, ki kot ba pynmih da ka sorkar, ki kot khubor naduh ka snem 1970. Ka Library ka don haduh 31,000 ngut ki nongpule ba la rejistar ia lade bad la ai 200 tylli ki kot man ka sngi.