“Phi long ka mluh jong ka pyrthei,” ong u Lyngdoh Sohblei Rangbah ka Goa

U Kardinal Filipe Neri Ferrão, u Lyngdoh Sohblei Rangbah ka Goa bad Daman, uba long ruh u President jong ka Conference of Catholic Bishops of India, ula ong ba ka Proseshon Ïukharist ka long ka jingphla paidbah ïa ka jingngeit ba U Jisu Khrist u don shisha ha ka Sakrament Ïukharist Bakhuid Tam. Da kaba ïaid lang bad ka Sakrament Bakhuid Tam lyngba ki surok, ki riewngeit ki phla paidbah ba U Jisu Khrist u long U Trai bad u don hapdeng jong ka jingim jong ki.
U Kardinal Filipe Neri Ferrão ula kren ia katei, kum u nongkñia ba hakhmat ha ka Mass Bakhuid jong ka Jingrakhe Ïukharist ba man la u snem jong ka Jylla Niam Bah Shillong, ha Kalbari, Laitumkhrah, ha ka Sngi U Blei. U Lyngdoh Sohblei Rangbah ka Shillong, u Victor Lyngdoh, bad u Lyngdoh Sohblei Nongïarap, u Bernard Laloo, kila ïasnoh lang bad u ha ka Mass Bakhuid, ha kaba la wan abnaiashimbynta lang da ki hajar ngut ki paid riewngeit ha ka Shnat Niam Maria Nongïarap ki Khristan.
Haba ai ka jingkren u Kardinal Ferrão ula ong, ba u ñiew ïa ka jingioh ban ïashim bynta ha kane ka jingrakhe kum ka burom kaba kyrpang bad ula batai ba ka Prosesshon Ïukharist ka long ka jingphla paidbah ïa ka jingngeit ba U Jisu Khrist u don shisha ha ka Sakrament Ïukharist Bakhuid Tam. Da kaba ïaid lang bad ka Sakrament Bakhuid Tam lyngba ki surok, ki riewngeit ki phla paidbah ba U Jisu Khrist u long U Trai bad u don hapdeng jong ka jingim jong ki.
“Phi long ka mluh jong ka pyrthei,” u Kardinal ula ong, lyngba ka Sakrament Baptis, uwei pa uwei u Khristan u long dkhot jong ka Balang bad u don ka jingkitkhlieh ban long u sakhi jong U Khrist ha la ki shnong, ha la ki imlang sahlang bad ha ka imlang sahlang kaba kham ïar.
Ula kyntu ïa ki riewngeit ban puson katno ki ïajan bad U Jisu, kumno kata ka jingïajan ka pynwandur ïa ka jingim jong ki bad kumno ki lah ban pynpaw ïa la ka jingngeit lyngba ki kam bad ula kyntu ïa ki riewngeit ban pynkhlaiñ ïa ka jingïadei kaba jan bad kaba im bad U Jisu.
Haba pynkynmaw ïa ka jinghikai jong U Khrist ba kito kiba ïaineh ha U kin seisoh shibun, ula kyntu ïa ki ban pule ïa ka Bible man la ka sngi, ban puson ïa kaei kaba ki pule bad ban shah ïa ka Ktien U Blei ba kan ïalam ïa ki ha ka shim rai bad ula kyntu ruh ïa ki longïing longsem ban buh por na bynta ka jingduwai hapdeng ki kam ba man la ka sngi. Namar ha ka jingduwai ki briew ki ioh por ban sngap ïa U Blei, ban pynpaw ïa ka jingieit bad ka jingsngewnguh jong ki, bad ban aiti ïa ki jingkhuslai jongki bad ula pynshlur ïa ki ban duwai marwei marwei bad ban duwai lang kum kawei ka longïing.
Ula batai ba ha ka jingrakhe ïa ka Ïukharist, ki riewngeit ki ïakynduh ïa U Khrist uba im bad ba kin pdiang ïa ka Komunion Bakhuid da ka mynsiem kaba kloi ban shah ïa ka jingdon jong U Khrist ba kan pynkylla ïa ka rukom im jong ki.
U Kardinal ula ong ba u soh jong ka jingïajan bad U Khrist u dei ban paw nyngkong eh ha la ïing bad kyntu ïa ki longïing longsem ban pynlong ïa la ïing ka jaka kaba don ka jingieit, ban ïamap haba mih ka jingïapher jingmut.