U pa ieid ba 104 snem bad ki skul pynkup burom kyrpang ka Riwar Mihngi Local Dorbars

Shi bynta ban ai mynsiem ia ki briew ka thain riwar ha ki bynta bapher bapher bad khamtam ha ka pule puthi, ka Federation of Riwar Mihngi Local Dorbars (FRMLD) ka la pynkup burom ia ki skul kiba pass lut ha ka eksamin matric bad higher secondary school kiba don ha riwar mihngi.
Ia kane ka jingpynkup burom la pyllong ha ka sngi Saitjain ha ka hall ka Bri War Resort.
Ha kane ka kynti, ka samla Lashembiang Khonglam na Mawpran ka la shah pynkup burom da kaba ioh heh mark tam ha ka Khasi ha ka HSSLC eksaminshon 2026.
Ka MDC ba nyngkong tam kum ka kynthei ka Kong Brosila Lamin ka la sakhi kum ka kongsan ha ka jingdon lang u President ka Federation u bah Joy James Roy Khongmawloh uba dei u sordar barim ka Raid Mawshun, bah Jiten Khongwieng uba dei u Joint Secretary, bah Edmund Khongngngai u Publicity secretary nalor ki nongkitkam bad ki dkhot bad ki khynnah skul bad ki nonghikai bad ki rangbah shnong.
Ka Federation ka la pynkup burom kyrpang ruh ia u paieid Relington Lamin uba la kot sha ka 104 duna khyndiat na ka shnong Mawshun uba la noh synniang ia ka thain ha ka imlang sahlang.
Ha ka jingkren ka kong Brosila ka la kyntu ia ki samla ban long kiba kut jingmut ban poi sha ka thong, bad ban iai shah ia ki jingtynjuh khnang ban wanrah ia ka nam ka burom ia ka iing ka sem, ka shnong ka thaw bad ka thain baroh kawei bad ka jaitbynriew.
Na ka liang u bah Joy ula ong ba ka thain riwar ka dei kaba pawnam bha namar ki briew ki long kiba leh khuid bad ka jingdon ki samla kiba stad, kiba trei shitom ban poi sha ka thong, ka la pynsangew sarong ia ka thain baroh kawei.
U la pynpaw ia ka jingsngewnguh ia u trai ka Bri War Resort u bah Rahul Khongsit uba la ai sngewbha ia ka hall ban pyllong ia kane ka prokram jingpynkup burom.