Rai ka JAC ban shong beit triang haduh da pyndam projek Ropeway

Ki longkmie kiba pyrshah ia ka Shyllong Ropeway projek hapoh ka Joint Action Committtee (JAC) ki la shong satar bad miet bad sngi ban iakhih tyngeh ban dawa na ka sorkar ba kadei ban pyndam noh shisyndon ia ka projek Shyllong Ropeway na u Lum Shillong sha Riat Laban.
Ka jingiakhih jong kine ki longkmie hakhmat u Mot Kiang Nangbah hajan Civil Hospital, mynta ka la iaid sha ka lai sngi bad ki la rai ban bteng ban iaid beit shakhmat ia kane ka jingiakhih haduh ba ka sorkar kan sngap ia ka jingdawa jong ki.
Haba kren sha ki lad pathai khubor, kawei ka longkmie ka la pynpaw ia ka jingsngew bitar bad sngewsih jur namar ba wat hapdeng ba ka dang shu dep ioh ia ka jingsumar, ka la hap ban mih madan ban iakhih.
“Nga ialade ngam dei kaba koit ba khiah, nga dei kaba dang ioh ia ka Radiation shibnai shiteng. Lada ngi ki longkmie kiba don ia ka jingpang jingshitom. Ka jingiap jong ngi phin bah khlieh maphi. Ngin ym khih nangne bad ngin ieng pyneh triang haduh ba phin da weng ia kane ka projek,” ong ka longkmie kaba dei ka dkhot jong ka JAC.
Ka la ther tyngeh ia kane ka sorkar kynthup naduh u Myntri Rangbah ka jylla u Conrad K Sangma bad ia u Myntri ka tnad Kam Jngohkai u bah Paul Lyngdoh, halor ka jingnud jong ki ban pynduh ia ka jingitynnad kaba la buh da u Blei ba la ri sumar da ki longshwa manshwa ia katei ka jaka kaba ai um ia ka sor Shillong baroh kawei.
Ka JAC ka la rai ba kan iai ap ia ka jubab na ka sorkar bad kin ym kynriah na kane ka jaka ba ki iakhih.
Ha kajuh ka por ki la dawa ba lada u Myntri ka tnad Kam jngohkai u bah Paul Lyngdoh um lah ban leh eiei halor kane, udei ban hiar shuki noh shi syndon kum u Myntri.