Pan jingkyrshan ki MDC Congress JHADC ia u Vincent H Pala da kaba pyrto ruh iaki kam ka Congress

Ki arngut ki MDC ka Congress ha JHADC ba kynthup ia u Madonbai Rymbai bad u Rikut Pareiñ haba kren pan jingkyrshan naka bynta u kyrtong ka party u Vincent H Pala ha kane ka MP by election shaka Lok Sabha, haka jingialang bala pynlong haka janmiet jongka 10 tarik mynta u bnai, kila kdew bad pynkynmaw iaki kam ba ka Congress ka leh hapoh ka Ri bad ka Jylla, kumjuh ruh ki kam ba u Vincent H Pala ula leh haki por ba u dang long MP.

U Madonbai Rymbai haba ai jingkren u ngeit skhem ba u Vincent H Pala un long biang u nongjop naka bynta ban mihkhmat sha parliament kumba ma u ruh hadien 3 samoi lynter ka jingioh long MDC ula shahrem noh shisien bad wanphai biang ha u snem 2025.

Bad ka jingjop u Vincent kan long ka jingkyrkhu iaki paidbah.

Haba pynksan iaki kam ka party congress hapoh ka Jylla u ong ruh ba dei tang kane hi ka party kaba lah ban wanrah iaka synshar khadar ba bit ba biang ia u paidbah.

U ong kiwei lei ki party khamtam ki party riewlum kin ympoi thong shaei shaei ruh ha kaba wat ka UDP ka party riewlum ba khlaiñ bha kaba juh don ruh iaki nongialam ba biang la ha State ne ki district ruh ka dang khyllem.

Shuh shuh u ong ki party riewlum kim lah hi ruh ban pyntynlun iaka kam synshar khadar da kaba u ai nuksa ia kaba la jia haka Jylla Assam ha u snem 1996 ba ioh synshar ka AGP ka party riewlum wat haba dei ka Jylla ba kham lah ban pynmih pisa dalade ialade ruh.

U khmih lynti ruh ba ym slem shuh iaka shuki prime minister ruh kan poi biang shaka Congress bad ki paidbah kin ioh biang iaki jingkyrkhu kumba ha Parliament mynta ka party congress dei kaba heh ka jingbun MP.

Naka liang u Rikut Pareiñ haba kren u ong, ka party congress dei kaba ieng ban iakhun pynioh laitluid iaka Ri na kti ka sorkar phareng, kaba pynioh iaka riti synshar (constitution) bad kaba ai ruh hangi u paidbah iaka jingshynsar laitluid bad ai ruh ki hok salonsar haki paid nongshong shnong ka Ri.

Katba ka sorkar NDA ba lamkhmat daka BJP kala pyrshang ban wanrah ki aiñ bapher bapher kiba ktah mationg ia u paidbah, kumta u kyntu ba kane dei ka por ban pyrkhat sani da kiba kumno ki nongmihkhmat ban jied naka bynta ba kin leit mihkhmat ha Parliament bad ka party kaba kum kano kaba ieng laitluid ban iasaid iaka hok u paidbah.

Haba pyntikna iaka jingiadei paralok ka NPP bad ka BJP u ong ba haka jingiadei bad ka CAB ha Parliament naka liang ka MP NPP na Tura kala don bynta ban ai jingkyrshan, na kata ka daw u ong hap pyrkhat bha ban pynjop ia u kyrtong ka NPP.

Nangta ban pynjop ia u kyrtong VPP ruh u ong hap pyrkhat namar dei u ban shu ieng hapdeng khlem kano kano ka liang bad marwei da lei lei un ym lah ban iasaid ban iada iaka jingthmu ka party BJP.

Da kaba u pynkynmaw ia u MP Ricky AJ Syngkon bala khlad noh, ba wat haba u don shibun kiei kiei ki jingthmu jingpyrkhat hynrei ban kren um iohlad bha ba lyngkot ka por ia u namar ba u dei u MP ba tang marwei.

Bad haba pynkut iaka jingkren u khot kyrpad iaki paidbah ban phai biang shaka Congress, bad ong ruh haoid phi la ai jingsneng iaka party jong ngi namar kum ki nongialam ym lah lait naki jingbakla.