Plie u MLA Ranikor ia ka iingskul thymmai ka Khlur Rit Govt. Skul L.P. School

U Bah Pius Marwein, MLA bad MDC ka Ranikor Constituency ha ka Sngi Ba-ar u la plie paitbah ia ka iingskul bathymmai jong ka skul Khlur Rit Government Lower Primary School ha ka shnong Lower Mawpud kaba hap hapoh ka Ranikor C&RD Block, South West Khasi Hills District.

Ïa kane ka iingskul la pyntrei lyngba ka School Infrastructure Upgradation Project – Phase III hapoh Mission Education, kaba la bei tyngka hapoh ka State Scheme ha ka jinglut ba T.44,79,448.l

Haba kren ha kane ka sngi, u bah Pius u la ong ba shibun ki jingkylla ki la jia ha ka pule puthi hapoh Ranikor Constituency naduh ba u la jop nyngkong kum u MLA ha kaba u la buh thong ia ka pule puthi kum ka mat ba kongsan tam. U la ong ba ki don shibun ki skul shimet bad ki skul sorkar kiba la ioh jingmyntoi lyngba ka skhim MLA, MDC bad kiwei kiwei ki skhim ha kine ki khyndiat snem ba la dep. U la ïathuh ruh ba ki don kumba 70 tylli ki skul sorkar ha Ranikor Konstitwensi ha kaba 22 tylli ki dei kiba la ïoh ïa ki jingtei thymmai na ka Mission Education lyngba ka School Infrastructure Upgradation Project naduh u snem 2021.

“Ha ki por ba la dep haba ngi peit ïa ki skul sorkar, ngi sngew lehraiñ namar ba ki iingskul ki jot rathai, hynrei mynta phi la ïohi ïa ki jingkylla hajan baroh ki skul sorkar ha ka Constituency,” ong u bah Pius.

U bah Pius u la khot ruh ia ki kmie ki kpa ba kin pynsngewthuh bad kyrshan ia la ki khun ba kim dei ban pep skul namar ka jingnang jingstad ka ai jingmyntoi ia u briew ha baroh ki liang. “Ka jingnang jingstad ka ai jingmyntoi ia ki khun jong phi ha baroh ki liang, kam ju long kaba lehnohei kumba don ki briew kiba ong. Nga sngewsih haba nga iohi ia ki khynnah rit ba ki pep skul. Dei na kata ka daw ba mynta la bun snem nga la iarap bad kyrshan ia ki khynnah baduk bad ki khunswet na ka bynta ka jingpule jong ki naduh ka bai skul, ki uniform, ki kot, ka bam, ka pisa bad kiwei kiwei ki jingdonkam. Ngam ju kwah ban put turoi ialade, hynrei ngan iathuh ia phi mynta ba ki don ar ngut ki khunswet kiba nga la kyrshan ha kine ki snem bad mynta ki pule doktor shabar ka jylla bad haduh mynta nga dang kitkhlieh ïa baroh ki jinglut jingsep jong ki,” ong u bah Pius ubs la kyntu ruh ïa ki nonghikai ba kin trei shitom namar ki dei ma ki kiba tei ïa ka lawei jong ka Ri.

Haba kren shaphang ka jingdonkam ba kongsan jong ka Khlur Rit Govt. LP School, u bah Pius u la ong ba un iai bteng ban buddien bad ka tnat pule puthi halor ka kamra shet bad ka paiñkhana kumba la kyrpad da ka managing committee, bad ruh u la kular ba un pynthikna ba kane ka skul ka dei ban ioh ia ka jingker kaba biang ban iada ia ki khynnah skul na ki jingmynsaw.
Ha kane ka prokram la wan ban ïadonlang ruh u Bah K. Thongni, Junior Engineer ka tnat pule puthi, South West Khasi Hills District, u Myntri ka Lower Mawpud, Bah Robert Basan, u Headteacher Bsh Khlain Mylliem, ki nonghikai, ki khynnah skul bad ki kmie ki kpa.