Ki nonghikai jong ka Khasi Jaintia Deficit School Teachers Association (KJDSTA) hynne ka sngi kila sdang ia ka jingiakhih sahngeh hikai bad khlem buh por.
Kane ka jingiakhih ki nonghikai ka long hadien ba ka sorkar ka la leh bym patiaw ia ki jingdawa jong ki kaba kynthup ban pyllait noh ia ka Dearness allowance (DA), ban pyndap ia ki kam nonghikai ha ki skul Deficit, ban kyntait ia ka skhim 2026 nalor kiwei de.
Haba kren sha ki lad pathai khubor, u Babu Boswel Pala, ula ong ba hynnin ka sngi ka 10 tarik Naiwieng, kila iohpdiang ia ka shithi na ka sorkar bad kaba pynlyngngoh ka long ba ka shithi ba ka phah kadei kajuh ka shithi barim naduh mynshwa bad ki shu pynkylla malu mala tang ban pyndep rukom.
Haba iadei bad ka DA, u babu Boswel ula ong ba ka sorkar dang shen ka la kular ba kan sa pyllait ia ka DA ha shwa ka shuti puja, hynrei mynta ki la weng ia kane na ka shithi bad ki la pynkylla da kaba ong ba ki dang iaid shakhmat ia ka DA.
“Ngi kwah ban kylli haduh katno kata ka jingiaid ka DA ka shim por bad lehse, ba ki briew sorkar kiba don ha ka tnad Pule puthi ki mong haba ngi pynpaw ia ki kam jler kam thok jong ki shabar,” ong u babu Boswel bad bynrap ba ka don ka jingbym leh hok kaba khraw lyngba ka jingpynslem bad ka jingbym ioh shuh ia ka hok jong ki.
Katba haba iadei bad ka jingpyntreikam Centralised Provident Fund (CPF) skhim, u babu Boswel ula ong ba ka la don ka skhim 2023 kaba la tyrwa hi da ka sorkar bad ki nonghikai ruh kila mynjur bad ki phah ia ka pisa jong ki na ki Account shimet sha ka CPF Account ha Laitumkhrah.
“Ha ka shithi ka sorkar ka pyrshang ban wohdong wohnia ia ka bym iahap eiei. Ki pyrshang ban wohdong ia ka Board of Trustee. Ka jingtuklar ia ka Board of Trustee, kadei ka bym shongnia eiei bad ki shu pyrshang ban pyniahap jubor bad ka Ain 1969,” ong u Babu Boswel.
U President ka KJDSTA ula ong ba Draft skhim 2023 kadei katkum ka Act 1969, kaba la kdew ba dei ban don ka Centralised Provident Fund bad ka skhim 2023, ka pyntreikam ia ka CPF. Katba ka skhim 2026, kaba ka sorkar ka pyrshang ban pyntreikam jubor kadei kaba iaid pyrshah ia ka Act 1969.
U babu Boswel ula ong ba ka sorkar kadei ban shim ia ka jingkitkhlieh halor ka jingduh bad ka jingshah ktah ki khynnah ha kine ki por eksam.
Ha kajuh ka por ula ong ba lada ka sorkar ka dang iai leh mutlop bad kam jubab eiei ia ka jingdawa ki nonghikai, kin sa shong jingialang bad shim da kawei pat ka rai.