Ïakhih ki driver bos pyrshah ïa ka sorkar halor ka jaka ïeng kali ha Ïew Mawlong

Ki draibar bos kiba kamai ha ki thain nongkyndong hapoh ka Khasi Hills Bazaar Bos Association (KHBBA) ki la pynlong ia ka jingiakhih sahngeh kamai ban pyrshah ia ka jingbthah ka sorkar ba kidei ban pyllait noh ia kane ka jaka ieng kali na parking lot Iew Mawlong, khnang ban buh ia ki nongshong madan.

U nongialam ka KHBAA u bah Kyrshan Rynjah Secretary ula ong ba ka sorkar ka la phah ia ki ban ieng ia ki bos ha anjalee ha khrum stand Jowai bad ia kane kim lah ban pdiang bad ki la rai ba kin ym khih bad kin ieng beit ha kane ka jaka ba ki ju ieng naduh mynshwa.

Ula ong ba ka jingbym treh jong ki ban kynriah sha kawei ka jaka, kadei namar ba ka jaka ba ki ieng mynta kadei ka Iew kaba naduh mynhyndai bad ka pynsuk ia ki bad kumjuh ia ki nongkit nongbah, ki nongleit nongwan, ki nongrep bad ki nongkhaii.

U bah Rynjah ula ong ba lada ka sorkar ka leh da ka bor, ka pyni ba kam khein snep ia kiba duk ba suk bad ki nongrep.

“Mynta ha kane ka jaka, ki nongbah nongkit ki shim T.30 shi kit bad lada kiew kham shaneng, ka la kham jngai bad ka bai kit ka la rem. Ynda la rem ka bai kit, ki nongkhaii ha ki shnong ki thaw ki hap ban pynkiew ia ki mar mata bad kane kan ktah ia kiba duk ba suk,,” ula ong.

Ula iathuh ba ki don kumba 60 tam ki bos ha kane ka jaka ieng kali bad ki ju kamai sha baroh 5 tylli ki District ha kaba ki ai jingshakri haduh 40 tylli ki shnong kum ka thain Mawryngkneng, Mawsynram, Balat, Jirang, Mawkyrwat bad kiwei de ki jaka.

Ula kyntu ia ki paidbah ba lada ki sngewthuh ia kane ka jingeh , kidei ban mih shakhmat ban ai jingkyrshan ia ki ban pynneh ia kane ka jaka ieng kali kumba ka long.