Lada ïai ïuhroit ïa ki longkmie pyrshah Ropeway, ym banse ban mih surok: Ardent

U President ka Voice of the People’s Party (VPP) u Bah Ardent Miller Basaiawmoit ula ong ba ka VPP kam banse ban mih surok lada ka Sorkar Jylla ka iai iuhroit iaki longkmie kiba ieng pyrshah iaka Shillong Ropeway Project.
Ia kane u Bah Ardent ula kren shi sngi hadien ba ki longkmie hapoh ka lama jong ka Joint Action Committee (JAC) Against the Shillong Ropeway Project kila tur sha Secretariat ban dawa naka Sorkar ban pyndam ne pynkynriah noh iaka Project na Lum Shyllong.
Haba kren lyngba ka kyrwoh ba la phah, u Bah Ardent u la ong “Hato ngin shu sngap bad peitkai ïa ka jingkuman bad jingleh ka Sorkar halor ka jingdawa ka JAC”.
“Ka party kam lah ban shu peitkai ïa ka jingleh ka Sorkar bad ngim lah ban shu ieh ïa kane ka kam tang ha ki longkmie. Kumta lada dei ïa ka VPP ban mih ruh kan sa mih, namar ba ka Sorkar ka la shu ïuhroit bad pyntieng ïa ki nongïakhih,” la ong u Bah Ardent.
U Bah Ardent ula ong ba ha kata ka por, lada ki mih kim dei ban kynnoh ba ki nongïalam ka VPP ki shim kabu ne ki leh politik halor kane ka kam.
U la ong ba katei ka khlaw ba thmu shna Ropeway, kadei ka khlaw jong ka jingbsa ïa ki tyllong um kiba bun ha kane ka jaka jong ngi bad khamtam ha Nongbah Shillong baroh kawei.
“Kine ki nongmihkhmat paidbah kiba long tang ki nongshakri paidbah, ki la leh ïa kane ka kam kumba kadei ka nongkynti jong ki, bad ruh kumba ki lah ban rai hi ïa kano-kano ka kam, khlem ka jingmynjur ki paidbah,” la bynrap u Bah Ardent.

Leave a Reply

Your email address will not be published. Required fields are marked *