Ngi lah jan kynjoh 100 percent kiba la nangthoh : Conrad

U Myntri Rangbah ka Jylla Conrad K Sangma hynne ka sngi ula shim bynta ha ka jingialang (Understanding of Lifelong Learning for All in Society) ULLAS Fest 2026 ha Soso Tham Auditorium, Shillong.

Ha ka jingialang la donlang u Myntri ka Pule Puthi u Bah Lahkmen Rymbui, u Commissioner & Secretary ka Pule Puthi u Vijay Mantri, ki ophisar sorkar, ki nonghikai bad ki la sam ia ki nongjop ia ka ULLAS bad ia ki nongpule ULLAS kiba heh rta na ka rilum Khasi bad Jaintia bad la pyllait paidbah ruh ia ka ULLAS Awareness Video ha ka ktien Khasi bad Pnar.

Haba kren ha ka jingialang u Conrad K Sangma ula ong, “Nga lah pynkup burom ia ki Toppers ne ki samla pule ba wan shakhmat ha ka eksam SSLC hynne ka step kumjuh ia kiba la rangbah ki bym pat nang thoh nang pule, hynrei kiba don ia ka jingangnud bad lada ngim lah ban leh ia kine ki briew ka mishon jong ngi kan ym long pura”.

U Myntri Rangbah ula pynpaw ka ULLAS ka dei ka prokram ba don burom ha kaba bun ki briew kim ioh kabu ban long kiba nangthoh nangpule, hynrei kane ka prokram ka la poi sha kito kiba don ka jingangnud ban nangpule bad thoh.

Ula kyntu ia baroh ba kin iatreilang ban kynjoh ia ka jingdon ki briew ba la nangthoh nangpule sha ka 100 percent.

“Ngi lah jan kynjoh 100 percent ka jingdon ki nongshong shnong ba la nangthoh nangpule, hynrei ngi hap ban iatreilang kum ka imlang sahlang ban wan rah jingkylla ha ka pule puthi ryngkat ka jingpynkup bor ia ki briew ha ka imlang sahlang” la ong u Conrad Sangma.

Ka Understanding of Lifelong Learning for All in Society (ULLAS) Scheme ka dei ka prokram jong ka Sorkar Pdeng ban kyntiew ia ka pule puthi bad ka jingai jinghikai ia kiba la 15 snem shaneng, ki bym ioh lad ban leit skul. Ka pynleit jingmut ruh ban ai jinghikai ha ka pule puthi ryngkat ki sap ki phong jong ki ban ioh kamai bad kiwei kiwei.