U Myntri Rangbah ka Jylla Conrad K Sangma ryngkat bad u Myntri ka tnad Pule Puthi u Bah Lahkmen Rymbui hynne ka sngi, ki la pynkup burom ia ki khynnah pule kiba wan shakhmat (Toppers) ha ka eksamin jong ka Secondary School Leaving Certificate (SSLC) na ka rilum Khasi bad Jaintia. Ha kane ka jingialang la iadonlang u Commissioner & Secretary ka tnad pule puthi u Vijay Kumar Mantri, ki kmie ki kpa, ki nonghikai bad ki ophisar na ka tnad pule puthi. Haba kren ha ka jingialang, u Conrad ula ai khublei ia kine ki khynnah kiba la wan shakhmat eh ha ka jingpule bad ula ong ba ha kine ki khyndiat snem kiba la leit ka jingpass ki khynnah ka la long kaba duna bha bad kane ka la pynkhuslai bha ia u.
“Ka long kaba sngewsih ban iohi ia ka jingpass duna ki khynnah hynrei mynta baroh ka la sdang ban kham bha bad nga ngeit skhem ba ha ki snem ban wan, ngin nang lah ban wanrah ia ki jingkylla kiba kongsan ha ka jinglong jingman ha kaba iadei bad ka pule puthi” ong u Myntri Rangbah bad ka pyntip ba ia kum kane kajuh hi ka prokram yn sa pynlong ban pynkup burom ia ki khynnah pule kiba wan shakhmat (Toppers) kiba na rilum Garo ka ban long ha ka 18 tarik mynta u bnai hapoh Tura.
U Conrad ula ong, ba ka jingthmu jong ka jingialang ka long ban pyntip sha ki khynnah pule ba baroh ki dap da ka jingsngew sarong bad ka jingtrei shitom jong ki dei ban ai jingiaroh. Ula kyntu ia kine ki khynnah ba la wan shakhmat ba kin iai bteng ban iaid ha ka lynti ba don akor bad kaba ryntih, ban iaineh skhem ha ka jingkut jingmut bad ban aiti met bad mynsiem.
You may also like
-
Ka Mawlong Nongtluh Weaving Center kan ai jingkyrshan ïa ki nongthaiñ jaiñ ka thain
-
Byrthen ïakhih ka KSU lada ym urlong ki 5 tylli ki mat jingdawa, kynthup ban pyndam ïa ka public hearing ka Shree Cement
-
Hukum ka Meghalaya HC ïa ka KHADC ban thung biang ïa u Ainam Manik kum u Syiem ba pura ka Hima Mylliem
-
Hapdeng ka jingiphuh kut ka shad Behdeiñkhlam ka Seiñraij Ialong
-
Hadien 2 bnai, ïaid biang ki kali harum Laitlyngkot, buh pulit ban shngaiñ ki paidbah