Ka thong ka VPP kam dei tang ban jop ilekshon kumba long kiwei, ynda la jop ki phet sha ka party ba kham iohnong: Batskhem

Ka MDC jong ka Mylliem konstiwensi ka kong Aibandaplin Lyngdoh ha ka jingialang ha Umlyngka, ka la ther ia kito ki seng sain pyrthei kiba thmu ban shim kabu da ka ktien Khasi ha kane ka ileskhon MP shiteng samoi sha Lok Sabha.

Haba kren ha ka jingialang ka kong Aibandaplin ka la ong ba kiwei ki party kila pynkhreh ban sei ia ki kyrtong bad don napdeng jong ki, kiba shim kabu haba ia dei bad ka ktien Khasi ban pynrung ha ka khyrnit ba phra jong ka riti synshar ka ri.

Ka kong Aibandaplin, ka la ong ba kane ka dei kawei napdeng ki mat ba u Dr. Ricky AJ Syngkon (Bam kwai ha Dwar u Blei) ula rah bad kren ha Iing Dorbar Thawain ka ri. Hynrei mynta pat la shim kabu da mano re mano haba iadei bad kane ka mat.

Ha kane ka jingialang ka la kyntu ia ki paidbah ba kin ai ka jingkyrshan kumba ki la ai ha ki ilekshon ba la dep.

Katba na ka liang u kyrtong ka MP ka VPP u Dr. Batskhem Myrboh ula ong ba ka thong jong ka VPP kam dei tang ban jop ilekshon kumba long kiwei ki seng sain pyrthei kiba shu ialeh ilekshon kiba shu peit tang ia uta uba kham i don pisa. Hynrei ynda la jop ilekshon ki ia phet na kawei ka seng sha ka kawei pat da kaba kam ba ki kham ioh nong na kawei party.

Ula ong ba ha kane ka ilekshon MP, ka party kan buddien ia ki mat ba la iehnoh da u Dr. Ricky bad ia ki nongrim treikam jong ka seng ba la pynmih ha u 2024.