Plie jingkieng iaid kjat u MLA ha Shangpung, pynbna T.15 klur ban pynbha surok

U MLA ka Raliang Constituency u Commingone Ymbon mynta ka sngi ula plie iaka jingkieng iaid kjat ha Leichka Shangpung Pohshnong, West Jaiñtia Hills District kaba dei ka jingkieng ka ban iarap shibun eh ia ki paidbah nongrep katei ka shnong naka bynta ba kin jam na shiliang sha shiliang ka wah Umyuriem haba ki leit rep riang sha ki lyngkha rep jongki khamtam haka por ba heh um.

Ia kane ka jingkieng iaid kjat la shna haka jinglut ba 49,98,700 lyngba ka District Rural Development Agency jong ka ophis u Deputy Commissioner ka West Jaiñtia Hills District.

Bad haka jingialang plie paidbah mynta ka sngi ba pyniaid da u Heingeitmon Suchiang chairman shnong Shangpung Pohshnong la sakhi lang daki nongialam shnong Shangpung Pohshnong, ki nongialam ka dong Leichka nalor ki paidbah nongshong shnong.

Naka liang ki nongkren ba kynthup naduh u waheh shnong Shangpung Pohshnong u Leadingstar Ñiang, u Shanborlang Dhar naka dong Leichka, u Dolloi ka Elaka Shangpung u Chanki Langbang kila iaroh iaki kam ba bha ba u MLA ula wanrah hapoh ka shnong Shangpung, kumjuh ruh haba iadei bad kane ka jingkieng bala plie mynta ka sngi kaba dei lyngba ka jingiarap jong u, ha kaba nangne shakhmat ki paidbah nongrep kim donkam shuh ban hap iaid daki kynta ban poi shaki jaka rep haka por ba heh um.

Kine ki nongkren kila ban jur ruh halor ka jingdonkam ban long ki paidbah nongshong shnong kiba iatylli ha kano kano ka kam naka bynta ka jingbhalang ka imlang sahlang bad ka roi ka par.

U MLA Commingone Ymbon haba kren u ong kane ka wah Umyuriem ba shna jingkieng iaid kjat nalor jongka dei kaba kongsan tam haka shnong Shangpung namar dei kaba bsa umbam umdih bad pyndap um iaki paidbah ha baroh ki liang lada dei haka rep ka riang kumjuh.

Kumta u kyntu iaki paidbah nongshong shnong ba kin pynneh pynsah iaka jingkhuid suba jongka kumba ka long mynta ka sngi.

Bad kumba ka jingdon kane ka jingkieng ka lah ruh ban buh jingma iaki khynnah, u kyntu ruh iaki kmie ki kpa ba kin sneng iaki khun ki kti ban ym wan lehkai ha kane ka jingkieng ioh jia ei ei kaba sngewsih.

Ha kane ka sngi u Commingone Ymbon ula pynbna ruh ba la ioh ia ka mang tyngka ban shna pynbha ia ki surok hapoh ka Shangpung Pohshnong kumba 15 klur, bad ruh la ioh skhim thied kali kit ñiut thymmai kumba 25 lak tam.