Ka sorkar ju ai jinghikai ia ki nongrep katkum ka juk ban ioh nong: Sñiawbhalang

Ka Krishi Vigyan Kendra Jaiñtia Hills mynta ka sngi ka la plie ia ka ophis treikam ba pura jong ka kaba don ha Wahiajer West Jaiñtia Hills District bad ha kane ka sngi kala pynlong ruh iaka jingpynsngewthuh paidbah shaki nongrep haba iadei bad ka project TDC-NICRA (Technology Demonstration Component – National Innovations on Climate Resilient Agriculture), kata ban hikai iaki nongrep lyngba ki buit jingstad thymmai kumno ban iada ia ki mar rep lane ban pynkhlaiñ iaka rep ka riang pyrshah ia ki jingkylla ka suinbneng.

Ha kane ka sngi u symbud myntri ryngbah ka sorkar Jylla u Sñiawbhalang Dhar ula long kum u kongsan ryngkat ka jingdonlang ka kong M.Dkhar Director of Agriculture (R&T) dept of Agriculture and farmers welfare govt of Meghalaya, u S.Rani Director of Agriculture dept of Agriculture and farmers welfare govt of Meghalaya, u Dr.G. Pratibha PL,TDC-NICRA, ICAR-CRIDA, Hyderabad, Dr AK Mohanty Director ICAR-ATARI, Zone VII Umiam, Dr. Larika M Challam former head KVK Jaiñtia Hills, Dr.Dayohimi Rymbai head KVK Jaiñtia Hills, Dr. P.K Pathak PL-NICRA new head bad kiwei nalor ki paid nongrep.

U symbud myntri ryngbah Sñiawbhalang Dhar haba kren u ong ha ka juk mynta ka jingnang jingstad ka long donkam ha baroh ki liang na kata ka daw ka sorkar ka wanrah ia ki jaka ai jinghikai ba kyrpang haba ia dei bad ka rep ka riang khnang ban long kita ki nongrep kiba rep da ka jingnang jingstad na ka bynta ban ioh nong bad ban dap ban biang.

Lyngba ka jingdon kum kane ka jaka ai jinghikai ki nongrep kin tip ia u jait symbai ba iahap bad ka jinglong jingman ka jaka, kumjuh ruh uba iahap ha kaba kumno ka aiom, namar ym baroh u symbai un seisoh ha baroh ki jaka, bad ym kajuh ka jinglong ka suiñbneng kan long ha baroh ki jaka.

U ong ruh ba naka liang ka sorkar India ryngkat ka jingiatreilang ka sorkar Jylla kala ialeh ban pynlut pisa daki spah klur naka bynta ki nongrep, bad ka sorkar Jylla hapoh ka jingialam ka MDA kala ialeh ban wanrah bun ki mission naka bynta ki paidbah naduh ka Yes Meghalaya, ka Helo Meghalaya, ka Fucus, Prime hub bad kiwei nalor ba ka ai subsidy ruh 50% iaki nongrep ban thied kali pickup ba kin ioh pyndonkam haka kit mar rep.

“Lada ngi kum ki briew ngim kheiñkor ia kano kano ka kam ba ngi trei, ngin ym long ki briew ba jop, kano kano ka kam hakhmat ka sorkar ka long kordor lut ym shym la ñiew poh kawei ruh”. Ong u Sñiawbhalang Dhar.

Bad bun ruh ki nongrep kiba rep daka jingnang jingstad kila long kiba riewspah kumta ymdei ban kheiñ kai iaka rep ka riang.

U khot bad kyntu ruh ban long ki briew ba iatreilang ha kano kano ka bynta da kaba kiar naka jingiabishni pihuiñ.

Ha kane ka sngi u symbud myntri ryngbah ula aiti ruh iaka kor power tiller sha ka longkmie Blossom Nongrum ba naka shong Niriang kaba la ioh iaka nam best NICRA farmers.

Bad haba pdiang ia kane ka kor power tiller ka kong Blossom Nongrum kala ai khublei iaka tnat jong ka rep ka riang, bad kala kyntu ruh iaki para nongrep ban iatrei shitom haka kam rep.

Ha kajuh ka por ka kyntu ruh iaki kmie ki kpa ba kin pynshlur iaki khun ban phai shaka rep ka riang wat lada dei kiba la nang la stad haka pule puthi ruh, namar ha kine ki sngi ban shu ap beit iaka kam sorkar kam long kaba suk.

Lada ialam lynti iaki khun haka rep kin ym duh kam namar kila lah ban ieng haka ki jong ki kjat, bad ruh namar ba ka rep ka riang dei u budlum haka jingim ba man ka sngi u briew.