32.37 million litar shisngi ki jaboh ba mih na sor Shillong

U Myntri Rangbahduh ka Ri u Narendra Modi hynne ka sngi, ula pyniaid ia ka jingialang lyngba ka Virtual Conference ban plie ia ka jaka pynkhuid ia ki jakhlia ne ka Faecal Sludge and Septage Treatment Plant, ha kaba ka Dr. M. Ampareen Lyngdoh Myntri sorkar jylla ka la iashim bynta ban khap ribon ban mihkhmat ia u Myntri Rangbahduh ka Ri. Kane ka prokram ka long shibynta ka jingrakhe ia ka Swachh Bharat Diwas (Clean India Day) ha kaba u Narendra Modi, u la ai bun ki projek sha ka ri kynthup ia ka Faecal Sludge and Septage Management Plant ha nongbah Shillong ba la tei lyngba ka Atal Mission for Rejuvenation and Urban Transformation (AMRUT). Haba kren ha ka jingialang ka Dr. M. Ampareen Lyngdoh, ka la pyntip ka sor Shillong ka pynmih kumba 32.37 million litar ka jaboh man ka sngi kynthup ia ka um jaboh ba leit sha ki septic tank bad ka um jaboh ba mih na ki jaka sait jingkhlieng bad kamra sum. Kiba bun ki jaboh ha ka sorkar ki dei ba la rung katto katne sha ki septic tank bad haba ka septic tank ka la shlei la leit lum pat da ki nongtrei ka SMB bad leit pyllait ia ka jaboh ha ka septage plant ha Marten ba lah ban sain ia katei ka jaboh kumba 115 litre ha ka shisngi.

Ka la bynrap ka sorkar ka la shimkhia ban shim ki lad ban pynkhie im biang ia ki wah lyngba ka Swachh Bharat Mission ba la sdang 2 tarik u Risaw 2014 da u Myntri Rangbahduh ka ri India. Ia ka jaka pynkhuid jaboh (Faecal Sludge and Septage Treatment Plant) la tei ha ka jinglut ba T.52.08 klur bad ia kane ka Plant la shna ban saiñ ia ki jaboh ban ai jingmyntoi ia ki 1 lak ki longiing ha ka sor. Ka Director ka Urban Affairs, kong Isawanda Laloo ka pynpaw ba ka Sorkar ka rakhe ïa u mawjam ba kongsan ha ka jingïaid lynti sha ka nongbah bakhuid, kaba koit ba khiah bad ban pynneh ia ka sor. Da ka jingiatreilang ngin lah ban pynurlong ia ka ri kaba khuid, ha kaba uwei pa uwei u nongshong shnong un ioh ia ka jingkhuid jingsuba. “Ngi sngew sarong ba ngi la kiew shaphrang ha ka jingpynïaid ïa ki jaboh jabaiñ, bad ngi la lah ban lum ia 171 metric ton ki jaboh man ka sngi” ong ka Kong Isawanda.

“Ka thong ka long ban pynthikna ba man ka shijaw ka um yn pynkhuid bad pyndonkam biang, da kaba pynneh ia ki marpoh khyndew ba kordor. Ngi burom ia ki nongtrei Municipal kiba trei shitom bad ki nongpynkhuid kiba pynlong ia ka sor ba khuid bad kaba koit ba khiah. To ngin iai bteng ban iatreilang, kum ka imlang sahlang ban iada ia ka mariang na ka bynta ki pateng ban wan” la bynrap ka Kong Isawanda. Ha kane ka sngi la pynkup burom ia ki 18 ngut ki Safai Mitra ne ki nongtrei jong ka SMB da ka National Insurance Company Ltd lyngba ka Janata Personal Accident Policy kaba long kumba T.2 lak marwei. Ha katei ka jingialang la iadonlang u P.K. Boro u CEO ka SMB bad u Secretary Meghalaya Urban Development Authority, u Joint Director ka Urban Affairs Department u Bah Biangmon Lato, ki heh ophisar sorkar, ki nongialam shnong ka Laitumkhrah bad kiwei.