La mang 500 klur ban pynheh iaki 3tylli ki Civil Hospital: 53 klur ban kyntiew iaka Ummulong CHC: Shen yn ioh MRI ha Jowai Civil Hospital

U myntri ka tnat jong ka koit ka khiah u Wailadmiki Shylla mynta ka sngi haba ai jingkren haka jingialang sam iaki tiar ba donkam shaki jaka ai jingsumar bapher bapher ka West Jaiñtia Hills District bad ruh ki tiar ba donkam shaki Anganwadi Centre lyngba ka ka jingkyrshan pisa ka power finance corporation Ltd. lyngba ka Corporate Social Responsibility (CSR) ha Mynthong District Library, u iathuh ruh ba nalor ka jingthmu ka sorkar ban pynbun ki nongtrei haki jaka ai jingsumar bapher bapher bad ruh ki tiar ba donkam. Ka sorkar kala mang pisa ruh kumba 53 klur naka bynta ban kyntiew kyrdan iaka Ummulong CHC shaka integrated hospital ha kaba ki jingthiah kin kiew sa 50 jingthiah da ka jingthmu ban lait jingkhangiah haka Jowai civil hospital.

Nangta u iathuh ruh bala mang ban pynheh ia 3 tylli ki civil hospital haka Jylla kata ka Shillong Civil Hospital, Tura Civil Hospital bad ka Jowai Civil Hospital haka mang pisa ba duna 500 klur ban pynlut.

Ia kane la mang halor ka thong ban kham lah shuh shuh ban ai ki lad jingiarap ia u paidbah khang ba kin lait ban leit sha kiwei pat ki jaka ai jingsumar ba kham biang.

Ha kajuh ka por u iathuh ruh ba shen ka Jowai Civil Hospital kan ioh noh ruh iaka MRI ha kaba la dep khot tender bad u khmih lynti sa tang katto katne bnai ka machine kala poi hi.

U ong ruh ba watla hapdeng bun ki jingduna bad jingeh ba mad ka jingiatreilang dei kaba donkam khamtam na ki paidbah namar la sngewthuh ba haka tnat ka koit ka khiah ym lah ban trei tang ka sorkar lane tang ki doctor ki nurse.

Kumta u khmih lynti ba da ka jingiatreilang yn lah ban kyntiew iaka koit ka khiah.