Ai ka President ia ka khusnam Padma Shri sha u Bah Hally War ha Rashtrapati Bhavan

Ka President jong ka ri India, ka Droupadi Murmu ka la ai ka khusnam Padma Shri sha u Bah Hally War na ka jylla Meghalaya ha ka Civil Investiture Ceremony-I kaba la pynlong ha Rashtrapati Bhavan mynta ka sngi (ka 25 tarik Jymmang, 2026).

U briew uba la pawnam ha ki kam iada mariang bad u nongsumar ia ka jingstad tynrai jong ki Khasi, u Bah Hally War u la paw pyrthei kum ka dak jong ka rukom im kaba iaineh bad ka jingpynwandur tynrai. La kha ia u ha ka 5 tarik u Rymphang, 1957, u la aiti palat san phew snem ban pynnehpynsah ia ka mariang, ban pynkhlain ia ka jinglah ban iaineh jong ka imlang sahlang bad ban kyntiew ia ka jingiahap bad ka mariang lyngba ka kam “bio-weaving’ kaba hyndai.

Naduh ba u dang shiphew snem ka rta, u Bah War u la pynhehpynsan bad pynwandurïa ki tynrai jong u diengFicuselastica ban thaw ïa ki jingkiengjri ba pawnam jong ka East Khasi Hills ha Meghalaya. Kine ki jingtei kiba phylla ki pyniasoh ia ki shnong kiba jngai katba ki long kum ki nuksa jong ka jingpynwandur ba iaineh kaba don tynrai ha ka jingstad tynrai.

Napdeng ki jingnoh synniang jong u kiba la pawnam tam kadei ka Umkar Living Root Bridge, kaba pyni ia ka jingpynhehpynsan da ki phew snem bad ka jingsngewthuh kaba jylliew shaphang ki jinglong jingman jong ka mariang. Ka jingkieng ka dang bteng ban ai ka jingïaid lynti kaba shngain na ka bynta ki pateng katba ka dang pyni ïa ka jingïadei hapdeng ki briew bad ka mariang.

Ha ryngkat ka jingstad jong u ha kane ka kam, u Bah War u la don ka bynta kaba kongsan ha kaba kyntiew ia ka imlang sahlang bad ka ioh ka kot jong ka thain jong u. Da kaba hikai ia ki longiing kiba don ha ka thain bad ban pynhiar pateng ia ka dustur jong ka jingthain ia ka jingkiengjri, u la pynthikna ia ka jingpynnehpynsah ia ka pateng kolshor kaba kyrpang. Ki jingpyrshang jong u ki la pynkhlain ruh ia ka jinglong jingman jong ka mariang jong ka lum Sohra bad pynshlur ia ka kam jngohkai pyrthei kaba lah ban iaineh, kaba ialam da ki nongshong shnong ha ka thain.

Watla u im ka jingim kaba sngewrit kum u nongrepuba rep kwai bad sohmarit, ki jingnohsynñiang jong u Bah War ha ka jingsumar ïa ka mariang bad ki rukom pynnehpynsah tynrai ki la wanrah ïa ka jingithuh kum uwei na ki riewshlurbashisha jong ka ri.

Ka khusnam Padma Shri ka ai jingithuh ia ka jingaiti jong u Bah Hally War ha ka jingim jong u ban pynnehpynsah ia ka mariang bad ka pyni ia ka jingdonkam jong ki jingnang jingstad tynrai ha kaba weng ia ki jingeh ha ka mariang ha kane ka juk mynta.

Ki kynrem ki lyndan kiba la iadonlang ha kane ka sngi ki long u Vice President ka Ri India, u Myntri Rangbah duh ka ri India bad u Myntri kam pohiing ka sorkarpdeng.