Pyrshah jur ka HYC ïa ka jingthmu ban teh Smart Meter ha WKH

Ka Hynniewtrep Youths’ Council (HYC), West Khasi Hills District, mynta ka sngi ka la leit jingïakynduh ïa ka Deputy Commissioner ka District, ka Hema Nayak, IAS, ban pynpaw ïa ka jingpyrshah jur halor ka jingthmu jong ka MePDCL ban pyndait Smart Meter ha ki shnong jong ka West Khasi Hills.
Ïa ka kynhun la lamkhmat da u President, Bah Lumlang Kharsyiemlieh bad u General Secretary, Bah Wanteibok Lyngdoh. Ka seng ka la pynpaw ïa ka jingsngewkhia ba ka Smart Meter ka lah ban pynkiew ïa ka bai bording bad buh jingeh ïa ki paidbah kiba dei ki nongpyndonkam.
Ka HYC ka la buh jingkylli ruh balei ba ka jingpyntreikam ïa ka Smart Meter ka sdang na West Khasi Hills ym na ki nongbah kum ka Shillong, Tura lane na Eastern West Khasi Hills kaba dei ka jaka jong u Power Minister.
Ka HYC ka la ong ruh ba ym pat shym la don ka jingïamir jingmut kaba biang bad ki paidbah shuwa ban pyntreikam ïa kane ka rukom treikam bathymmai. Kumta ka seng ka dawa ba dei ban ai jingpynshai bad shim ïa ka jingmynjur jong ki paidbah shuwa ban pyntreikam ïa kano kano ka system bathymmai.
Na ka liang ka Deputy Commissioner, ka la kular ban pynpoi ïa ki jingpynsngew bad jingdawa jong ka seng sha ka Sorkar Jylla bad ban bthah ïa ka MePDCL ba kan pynlong shuh shuh ïa ki prokram ai jingpynshai paidbah halor kane ka kam.
Ka HYC ka la dawa ïa ka Sorkar ba kan ym pyntreikam jubor ïa ka Smart Meter ha West Khasi Hills tad haduh ban da lah pynbeit ïa ki jingsngewkhia jong ki paidbah, bad ka la kyrpad ruh ïa ki MLA jong ka District ban tuklar halor kane ka mat kaba ktah ia ki paidbah.