Bitar ki paidbah ïa ki Pulit bad Bor District ba khang ïaid kali ha ki thaiñ Polo

Ka nongbah Shillong hynne ka step, kala sakhi ka jingdheng kali kaba jur namar ka jingbym shah ki Pulit ban iaid ki kali namar ka jingwan u Myntri ka tnat Sorkar Pdeng u Amit Shah, kiwei ki Myntri Sorkar Pdeng bad ki Myntri Rangbah jong kiwei ki Jylla, ki Lat jong ki Jylla ban shim bynta haka jingïalang 73 Plenary jong ka North Eastern Council (NEC).
Kane ka jingbym shah ki Pulit iaki kali ban iaid kala wanrah ka jingïania ka ba jur hapdeng ki nongleit nongwan bad ki bor District haka jingdonlang ki Pulit.
Naduh ka por 10:30 baje mynstep ki Pulit kila bat iaki kali kiba wan na ki bynta jong ka surok ba wan na ki thaiñ FCI ban poi sha Polo.
Na kane ka jingpynsangeh ïaid shipor ïa ki kali ka la mih ka jingsngew bitar kaba jur na ki paidbah ba leit ba wan ha kaba ki la pynrem jur ïa ki bor pynïaid District bad ki la pynpah ïa ki horn kali jongki katba u Amit Shah u dang ïaid lyngba katei ka surok.
Haba la ïohi ïa ka jingdom ba ka jingbitar ki paidbah ha katei ka jaka, ki bor District bad ki Pulit ki la pynshang ban pynjai jai katba lah da kaba ong, “Ïaishah tang katto katne minit bad kyrpad ïa ki paidbah ba kin ai ka jingïatreilang bad ka bor District.”
Naka liang ki paidbah ki la kynnoh ba khlem don kano-kano ka jingpyntip ba kan don ka jingkhang ïaid kali bad kane ka jingshah pynsangeh iaid kali ka la ktah ïa ki, ha kaba ki la pynpaw ba ki don kiba la poi slem sha ki jaka trei jongki.
“Kane ka jingleh ka paw ka jingtlot ki bor pynïaid , ka long ruh ka jingthombor bad pynkam bakla ïa ka bor ba ki don kim kiba bat ïa ka aiñ, kane ka pynsyllang ïa ngi ki paidbah” la ong uwei u riew paidbah.