Ka sorkar kan khang noh ban wanrah sniang na shabar jylla ‘Shah ktah ki nongrep na ka African Swine Flu’

U MLA ka Mawkynrew u Bah Banteidor Lyngdoh ula pyntip ka Sorkar kan sa pynmih ia ka jingpynbna (Notification) ban nym shah shuh ban wanrah ia ki sniang na shabar shapoh ka Jylla Meghalaya.Ia kane u Bah Banteidor ula pyntip hadien ba wai ka jingialang bad u Myntri ka tnat Animal Husbandry Veterinary u Bah Sanbor Shullai ha ka jingdonlang ki Officer bad ki doctor ka tnat lem bad ka seng Federation of Piggery Farmers of Meghalaya (FPFM).Haba kren sha ki lad pathai khubor u Bah Banteidor ula ong ba baroh ki tip ka daw ba sar ka khlam African Swine Flu ka dei namar ka jingwan poi ki sniang na kiwei ka Jylla ka ri shapoh Meghalaya kaba la ktah pat ia ki nongri sniang  ha Jylla.

U Bah Banteidor ula ong, ha ka jingialang bad u Myntri ka la don ka jingiakren sani bha halor ka jingshah ktah ki nongrep bad ki nongri jingri namar ba sar ka jingpang iap sniang.Ula iathuh ba naka liang u Myntri ula pyntip ba un sa rah ia kane ka mat hakhmat u Myntri Rangbah khnang ban ioh iathir haka kynhun Myntri Sorkar khnang ban lah ban shim iaka rai kaba biang tam naka bynta ki nongrep bad ki nongri jingri jong ka Jylla.”U Myntri ula kular ban rah iankane ka mat haka jingiakren ka ban pyniaid da u Myntri Rangbah ka Jylla namar kane kadei ka mat kaba khia bha namar ka ktah iaka jingiap jong ki sniang bad ka ktah iaki nongrep bad ki nongri jingri kaba la ktah kylli iaka dor jong ki sniang ha baroh kawei ka Jylla” la ong u Bah Banteidor.

“Nalor ka jingkular ban iakren bad u Myntri Rangbah, u Myntri ula kular ban pynmih daka jingpynbna (Notification) jong ka Sorkar ban khang ban wanrah sniang na bar Jylla khnang ban lait naka jing sar ka khlam iap sniang hapoh ka Jylla jong ngi” ula ong.U Bah Banteidor ula kam ba bun ki nongrep bad kiba ri jingri kiba im naka kam ri sniang, mynshwa ki die T.17,000 haduh T.18,000 uwei u sniang hynrei mynta namar ba sar ka khlam, ki hap die noh T.11,000 lane T.10,000. “Kane kala ktah bha iaki bad dei naka ta ka daw da long kumno kumno ruh dei ban pynmih daka jingpynbna (Notification) ba dei ban khang shwa iaka jingwan rung ki sniang na sha bar shapoh Meghalaya” ula ong.