Kynnoh ka HITO ba pynjaboh bad pynkheiñ aiñ ka RNB Cement Pvt Ltd

Ka Hynñiewtrep Integrated Territorial Organisation (HITO) ka la ujor sha ka Meghalaya State Pollution Control Board (MSPCB) bad kynnoh ba pynjaboh ia ka lyer bad ka jingpynkheiñ aiñ ïada mariang da ka RNB Cement Pvt Ltd ha Umiam, Ri Bhoi District.Ha ka jingujor sha u Member Secretary ka MSPCB, u president ka HITO u Bah Donbok Dkhar u la ong ba katei ka karkhana ka pynmih shibun ka jaboh bad ka tdem iong sha ki sawdong sawkun.”“Ngi sngewkhia khamtam eh ba, ha ki katto katne ki khep, ki jingmih ki paw ba ki mih na kiwei pat ki jaka lait na ki Atoskhana ba la buh kyrpang, kaba pynlong ïa ka jingpynmih  tdem kaba sniew sha ka suiñbneng khlem da tehlakam,” ong ka shithi. Katkum ka jingong jong ka HITO, ki nongshong shnong kiba don hajan ki la pynpaw ïa ka “jingsngewkhia kaba jur halor ka jingmih ka td iong bad ka jingktah nangne shakhmat.

“Kum kine ki jingmih tdem la iathuh ba ki la pynmih ia ka jingsngewkhia kaba jur hapdeng ki nongshong shnong kiba don hajan, kiba tieng ia ka jingshahktah haka koit ka khiah jong ki paidbah, ki jaka rep, bad ia ka mariang” la ong ka jingujor. “Ka jingiaipynmih jaboh dewbilat clinker bad ka tdem iong ka lah ban ktah ïa ka jinglong ka lyer bad ka lah ban wanrah jingma ïa ki paidbah khamtam ia ki khynnah, ki tymmen, bad ki briew kiba don jingpang pynhiar mynsiem” ka la bynrap. Ka seng ka la bthah ia ka MSPCB ban pynlong ia ka jingjurip mardor bad kaba bniah ia ka karkhana bad ban pynshisha ia ka jingbud ryntih ia ka ain Air (Prevention and Control of Pollution) Act, 1981, ka Environment (Protection) Act, 1986 bad kiwei kiwei ki kyndon ain. Ka HITO ka la kyrpad ia ka Board ban bishar bniah hato ki jingmih tdem ki mih lyngba ki jaka bala buh kyrpang (Atoskhana) ne katkum ka ba la mynjur iaka rukom pynmih tdem.

Kala kyntu ruh ïa ka MSPCB ban bthah ïa ki bor badei khmih ban pynsaja iaka karkhana lada lap ïa ki jingpynkheiñ bad “buddien ïa ka jinglong ka suiñbneng ha ki shnong ba marjan bad pynlong paidbah iaka kaiphod. “Ka HITO ka ngeit ba ka jingseng ïa ki karkhana ka dei ban ïahap beit bad ka jingïada ïa ka mariang bad ka koit ka khiah bad ka jingbha jingmiat jong ki nongshong shnong,” ong ka shithi, da kaba kyrpad ïa ka Board “ban kheiñ ïa kane ka kam kum kaba kyrkieh bad ban shim khia mardor ban ïada na ka jingpynjot ïa ka mariang.” Ka la aiti ia ki video jong ki jingpynmih tdem ba la kynnoh ryngkat bad ka jingujor bad ka la ong ba ka khmih lynti ban ioh jingtip ia ka sienjam ba la shim daka MSPCB.