Pynkup burom ia saw ngut ki tymmen ha ka sngi rakhe ki riew tymmen

Ka tnad Social Welfare ka sorkar jylla hynne ka sngi ka la rakhe ia ka sngi kyrpang jong ki riew tymmen ka ‘International day of older person’ ha State Convention, Shillong.Ha kane ka sngi, ka tnad ka la pynkup burom ruh ia saw ngut ki riew tymmen kiba la kham noh ka rta bad la pyni ruh ia ka dur bad ki video ban sah kynmaw ia ka jinglong jong ki shnong ki thaw, ki kali ha ki por ba mynshwa.

Haba kren ha kane ka sngi, u Adviser ka tnad Social Welfare u bah Paul Lyngdoh ula ong ba ka jinglong tymmen ka dei kaei kaei kaba baroh ki hap ban iaid lynti ha ka jingim.

Ula ong ba ka jingpang kadei kawei ba baroh ki ialeh ban kiar bad niew ba dei ka jingtim, ka lyngkor bad kadei kaei kaei kaba khanglad ban im ia ka jingim ba pura. Hynrei ula ai mynsiem da kaba iathuh khana shaphang i mei ieid Kmoin wahlang iba don ia ka jingpang ha ka kpoh bad ila iakhun ia kata ka jingpang da ka iaid ba ieng ha kaba mynta ka la sdang ban mareh ha surok. I meiieid Kmoin wahlang ila mih khmat ia ka India ban leit ia shim bynta ha ka Marathon ha kylleng sawdong ka ri bad sha bar ri ruh kumjuh.

U bah paul ula ong ba ka jinglong tymmen kam dei kaei kaei kaba hap ban iakhun ne pyrshah, hynrei ka jinglong tymmen kadei ka jingiaid lynti jong ka jingim.

Ula ai khublei ia baroh ki riew tymmen ki riewsan bad kyntu ia ki ba kin rah ka khubor ba ha man ka jingiaid lynti jong ka jingim, don beit ka lad ban tip bad noh synniang ha kiba bun rukom.katba na ka liang ka Chairperson ka Meghalaya State Commission for Women ka kong Iamon Syiem ka la ong ba ha ka jinglong tymmen dei ban im Laitluid khlem kano kano ka jingsheptieng.

Ka Chairperson ka la ong ba ha kane ka juk, ki don ia ka ‘National Policy’ na ka bynta ban iada bad ban sumar ia ki rangbah bad ki tymmen bad ki don ruh ki ain bad ki kyndon, kum ka ‘Maintenance and Welfare of Parents and Senior Citizens Act’ jong u snem 2007.

Ka Director ka Social Welfare ka Saloni Verma ka la ong ba ka jinglong tymmen dei ban burom ban ieit namar baroh ki hap ban iaid lyngba ha ka jinglong tymmen.“Ka jinglong tymmen kam dei tang ia ki riew rangbah tymmen jong mynta, namar ha kaba khatduh ngi baroh ngi lah ban tymmen bad kano kano ka imlang sahlang kaba ngi tei mynta, ngin sa ioh pat lashai,” ong ka Saloni.