Ki ‘Sohpyut bad kruin’ ki don ha Secretariat ym ki Nonghikai:HYC

Ka Hynniewtrep Youth Council seng kmie lyngba ka tnad Education cell hynne ka sngi ka la leit ban tur kynsan sha Secretariat ban the bad tah ia ki banner pynrem bad dawa ba u Bah Prestone Tynsong udei ban panmap halor ka jingkynnoh kren bein ia ki nonghikai skul deficit kiba pynlong ia ki jingiakhih.

Ha ki jingthoh ka HYC ka la ong ba ki nonghikai kim dei ki sohpyut, burom ia ki nonghikai, u Bah Prestone udei ban panmap bad kiwei kiwei ki jingthoh.

Ha kane ka jingleit tah banner, ki dkhot jong ka HYC ki la khluit hi tar ia ki pulit kiba jynrat ia ki banner ba ki la teh ha khmat Secretariat kiba thoh pynrem ia u Symbud Myntri Rangbah ka Jylla u bah Prestone Tynsong.

Haba kren sha ki lad pathai khubor u samla Enlang Sawian ula ong ba ka jingleit teh banner jong ki, ka long ban pynrem ia ka jingkren u bah Prestone uba la kynthoh ia ki nonghikai kum ki kruin bad ki Sohpyut.

“Ngi pynrem jur ia u Symbud Myntri uba la kynthoh da ki kyntien ki bym lah ban pdiang da lei lei ha ka imlang sahlang. Ki nonghikai ki dei kita kiba ai ka jingshakri ia ki khynnah ki samla ban saiddur ia ka lawei jong ki bad ka jylla. Ka kyntien ba u Symbud Myntri ula kren tohkmet ia ki nonghikai, ka pyni ba kane ka sorkar MDA kam burom ne ka suidniew ia ki nonghikai,” ula ong.

U samla Enlang ula ther ia kane ka sorkar da kaba ong ba kita ki ‘Sohpyut bad ki Kruin’ kim dei ki nonghikai hynrei ki dei kiba shong ha Secretariat kiba pynbam kruin ia ka jylla baroh kawei.

Ula ong na ka liang ka seng ka ai ka jingkyrshan ia ki nonghikai bad ki sngewthuh ba ka mat jingdawa jong ki ka long kaba khia bha bad donkam.

Leave a Reply

Your email address will not be published. Required fields are marked *