Ha kajuh ka jaka lah ban rep bun ki jingthung, kamai T.8 lak u nongrep jhur ha Garo Hills

Ki nongrep ha South West Garo Hills ki nangkiew lyngba ka jingkyrshan ka sorkar na ki skhim bapher bapher ban kyntiew ia ki rukom rep katkum ka juk mynta ban pynmih kimar rep ban ban kyntiew ia ka ioh ka kot.

Ka kynhun ki nongthoh khubor na Shillong ba la pynbeit da ka ophis Directorate of Information and Public Relations (DIPR), ki la leit ban jngoh ia katto katne ki projek kam rep bad la lap ia ka jingiaid shaphrang ki skhim ban kyntiew ia ki nongrep ha ka District.

Ha shnong Harigaon ba hap hapoh ka Rerapara Block, ka kynhun ka la leit jngoh ïa ka jaka rep jhur khlem khlen dawai jong u Nerdaya Koch naduh u snem 2013-14.

U Coch ula iathuh ba u rep bun ki jingthung ha kajuh ka jaka, kata ha ka por lyiur da ki jhur kum tyrso, kubi bad u sara ia ki symbai jhur ha ki poli ha ki sem tap plastik ban die sha kiwei pat ki nongrep katba ha ka por tlang u rep da u pathaw bam im bad kiwei lyngba ka jingiarap ka tnad Horticulture, South West Garo Hills, Ampati.

U ong kumba long mynta u don ka jaka 1.5 hectare bad na kane kam rep u ioh kamai u ioh kamai kumba Rs. 7-8 lak ha u snem 2025-26 na ka jingrep jhur. Nalor ka jingrep jhur, u Koch ula sdang mynta ban pyniar ia ka kam rep da u soh Dragon bad Sohshan ha kajuh ka jaka ban kham ioh kamai.

Ka tnad Horticulture ka la kyrshan ban ki symbai ha ka jingiarap ba 75 percent na ka Vegetables Development Scheme. La buh ruh ïa ka jingtheh um da ka um (Drip irrigation) hapoh ka bynta jong ka Per Drop More Crop (PDMC) jong ka Pradhan Mantri Krishi Sinchayee Yojana (PMKSY) ha u snem 2025-26.

Kumjuh ka kynhun ka la leit jngoh ia ka jaka rep soh dragon jong u Robelson M. Marak ha Ampati Songma, kaba la sdang naduh ha u snem 2023 lyngba skhim Mission for Integrated Development of Horticulture (MIDH) ha u snem 2022-23 bad ki jingiarap lyngba ka Fruit Development Scheme ha u snem 2025-26.

Ula iathuh ha u snem 2025 ula ioh kumba 80-100 kilo u soh dragon bad kamai haduh T.35-50 hajar bad u don jingthmu ban pyniar shuh shuh ia ka kam rep.

Ka kynhun ki nongthoh khubor ki la leit jngoh ruh ia ka Zikzak Horti Hub ba pyntreikam lyngba ka Rural Infrastructure Development Fund (RIDF) na ka bynta ban rep ïa ki syntiew Anthurium, Gerbera bad Dendrobium ha ka jaka ba heh kumba 500 square metre.

Katei ka projek ka kynthup ia ka jingheh kaba 1,500 square meter ha ka jinglut ba T.70 lak ha u snem 2023 bad la pyndep ha u Risaw 2025. Na kane jaka rep ka tnad Horticulture ka kamai T.2 lak shisnem na ka jingdie ia ki syntiew bad kiwei ki jhur. Hynrei ka jingioh kamai jong ka projek ka shah khanglad namar ka jingpynslem ban siew ki nongthied jong ki tnat treikam.

Ha kane ka jaka ka don ruh ka Vertical Column Method ban pynmih symbai ia u sohmrit ban sam sha ki nongrep lyngba skhim Rashtriya Krishi Vikas Yojana (RKVY) ha u snem 2023-24. Ia kane ka projek la mang T.36.62 lak ha ka jaka ba 1,000 square metre na bynta ban pynmih bun jaid ki mar rep.

Leave a Reply

Your email address will not be published. Required fields are marked *