Ka jingthaw ia ka MTTA ka long ka jubab ia ka PGI 2.0 bad PARAKH

U Myntri Rangbah ka Jylla u Conrad K Sangma hynne ka sngi ula plie ia ka Meghalaya Teachers Training Academy (MTTA) ha ka jingdonlang u Myntri ka tnad pule u Bah Lahkmen Rymbui, ki Ophisar bad kiwei ba don bynta ha ka pule puthi. Haba kren ha ka jingialang u Conrad Sangma ula ong, ka jingtei la dep ban plie kham shuwa, ‘mynta ka sngi ka pyni ia ka jingsdang ka Academy bad ka thong ka jingthmu bad ka jingtreikam jong ka”. “Kane kam dei tang ka jingtei, hynrei kan wanrah ka rukom treikam ban pynkhlain ia ka pule puthi ha Meghalaya. Kane ka Academy kan shim bynta ba donkam ban weng ki jingduna khamtam ban hikai pyntbit ia ki nonghikai” ong u Conrad.

Ka jingthaw ia ka MTTA ka long kum ka jubab ia ki jingeh hakhmat eh kiba la pynpaw ha ka National Assesment kum ka PGI 2.0 bad PARAKH Rashtriya Sarvekshan 2024, kaba la buh ia ka Meghalaya ha ka kyrdan ba shatrai duh (Akanshi-3) ha ka Students Learning Outcomes ne jingmih ba ki khynnah skul ki ioh na ki jingpule. Ki jingkhein ki batai ruh ba tang 17% na ki nonghikai hapoh ka Jylla kila iashimbynta ha ki jingpyntbit ia ka kam ba ki trei ha ki snem bala leit noh. Ka Sorkar ka la kynriah noh na ki jingpynlong ia ki jingai jinghikai ne workshop ba shisien sha ka rukom treikam ba la pynbeit ryntih, ka jingai jinghikai pyntbit ba iai bteng khlem sangeh. Ia ka MTTA la seng kum ka shnat treikam ba lait luid hapoh ka Meghalaya Societies Registration Act, 1983, kaba don ia ka jingkyrshan ba khlain ha ka jingpyniaid kam bad ka jingkhmih beit beit da ki briew ba don ha ka kyrdan ba halor tam.

U Myntri Rangbah ula ong, “Ka pule puthi ka long kum u ksai sohkyrdot, lada phi tan eh ia uwei u ksai, uwei pat u nangskhem. Ngi dei ban law suki suki ia u ksai ba sohkyrdot” bad ula kren halor ki rai ba kongsan ba la shim ka Sorkar, kynthup ka jingpynbeit ryntih ia ka jingsiew jong palat 23,000 ngut ki nonghikai SSA, ka sienjam kaba hap ban pynlut pisa jan kumba T.800 klur ha ka shisnem. Ka MTTA ka wanrah ïa ka rukom treikam “Hub-and-Spoke” model, ha kaba ka Academy kan long kum ka Apex body kaba iasoh bad ki DIET bad ki CTE ha baroh ki district. Kane ka pynthikna ba ka training kaba bha bad kaba janai kan poi sha ki nonghikai kaba long markam ki jaka trei jong ki, bad ban pynduna ïa ka jingshim ia ka por jong ki ban don ha ki skul.